«ՀԺ». Արմեն Մովսիսյանի նախարարի պաշտոնից հեռանալը բարերար ազդեցություն է թողել

ՀՀ էներգետիկայի և բնական պաշարների նախկին նախարար Արմեն Մովսիսյանը, ով այդ պաշտոնը զբաղեցնում էր ավելի քան 13 տարի, և այդ ցուցանիշով Հայաստանի երրորդ հանրապետության ամենաերկարակյաց նախարարն էր, անցած ամիս պաշտոնանկ արվեց և նշանակվեց ՀՀ նախագահի խորհրդական:

Սովորաբար այս պաշտոնին նշանակվում են նախկին նախարարները, որոնք նոր ձևավորվող կառավարությունում տեղ չեն գտնում, բայց նրանց չեն էլ ուզում նեղացնել: Եվ դա համարվում է այդ պաշտոնյաների կարիերայի մայրամուտը: Բայց Արմեն Մովսիսյանի դեպքում նախարարից խորհրդական դառնալը բարերար ազդեցություն է թողել նրա նյութական վիճակի վրա: 13 տարի լինելով «ամենայուղոտ» գերատեսչություններից մեկի ղեկավարը՝ նա օգտվում էր, մեղմ ասած, շատ մեղմ ասած՝ համեստ մեքենայից՝ սովորական «Շկոդայից», որը թերևս եվրոպական արտադրության ամենաէժան մեքենաներից է՝ 25-30 հազար դոլար արժողությամբ: Այս մեքենան ՀՀ նախարարներին սպասարկող ամենաէժան մեքենան էր՝ առնվազն վերջին 7-8 տարիներին: Գրում է «ՀԺ»-ն:

Նախարարական պորտֆելը կորցնելուց հետո Արմեն Մովսիսյանը «ման է գալիս» «Լեքսուս LX 570»-ով, որի գինը սկսվում է 120 հազար դոլարից: Ուսումնասիրելով Մովսիսյանի և նրա հետ փոխկապակցված անձանց գույքի ու եկամուտների հայտարարագրերը՝ այդպես էլ չգտանք ոչ այս մեքենան, ոչ էլ նման մեքենա ունենալու որևէ տեսական հնարավորության ակնարկ:

Հայտարարագրերում որևէ շարժական կամ անշարժ գույք նշված չէ, իսկ եկամուտները սահմանափակվում են տարեկան մոտ 3,6 միլիոն աշխատավարձով և նրա հաշվին եղած 15 հազար դոլարով, որը ոչ ավելացել է, ոչ պակասել անցած 4 տարիների ընթացքում: Որտե՞ղ էր թաքնված այս «Լեքսուսը»:

Նկատենք, որ Մովսիսյանը մի ուրույն ընդունակություն ունի: Նա կարողանում է խնամքով թաքցնել հսկայական «գաղտնիքներ»: Օրինակ՝ նա երեք տարի շարունակ թաքցնում էր ՀՀ՝ Ռուսաստանին ունեցած 300 միլիոն դոլարի պարտքը: Շատերը գիտեին ու հաշվարկում էին, որ նման պարտք է գոյացել, բայց նա համառորեն շարունակում էր թաքցնել այդ պարտքը, որի դիմաց վճարեցինք «Հայռուսգազարտի» բաժնետոմսերով: Բայց ինչպես այդ պարտքը, այնպես էլ անձնական գումարները ու գույքը, երկար թաքցել չի ստացվում: 300 միլիոն դոլարի պարտքն ու «Լեքսուսը» դրա վառ ապացույցներն են»:

Մանրամասները՝ թերթի այսօրվա համարում: