Արսեն Բեգլարյանը` Ռուսաստանի առաջնություն տեղափոխվելու, Բերեզովսկիի, Մովսիսյանի և «Յունայթեդում» խաղալու երազանքի մասին

Հայաստանի ազգային հավաքականի դարպասապահ Արսեն Բեգլարյանը ծավալուն հարցազրույցի ընթացքում պատասխանել է Чемпионат.com-ի հարցերին:

«Հստակ ոչինչ չկա, միայն խոսակցություններ են: Սակայն ուրախ կլինեի Ռուսաստանում խաղալու համար: Ռուսաստանն ուժեղ առաջնություն ունի: Այնտեղ հայտնվելը հետաքրքիր կլիներ: Ուրախ եմ, որ ինձ Հայաստանի հավաքականն ուշադրություն դարձրեց: Նախ հանդես էի գալիս երիտասարդական թիմում, իսկ անցյալ տարի հրավեր ստացա ազգային ընտրանուց: Ինձ համար շատ հուզիչ պահ էր, երբ առաջին անգամ հայտնվեցի հավաքականում և ծանոթացա Բերեզովսկիի հետ: Նա ինձ միշտ իր խորհուրդներով օգնում է, սովորեցնում է դարպասապահի խորամանկություն: Ռոմանը մեր ավագն է և դա ապացուցում է  յուրաքանչյուր օր:

Յուրա Մովսիսյանն ուժեղ հարվածի է տիրապետում: Նա դաշտում շատ արագ է որոշում կայացնում: Նա խորամանկ հարձակվող է: Յուրային նայելով` հստակ հասկանում ես Հայաստանի և Ռուսաստանի առաջնությունների միջև տարբերությունը: Դա տեխնիկական վարպետության բոլորովին այլ մակարդակ է: Մարզումներին նրան դիմակայելը շատ բարդ է:

Բուֆոնն իմ սիրելի դարպասապահների թվում է: Սակայն ամենաշատը հավանում եմ Վան դեր Սարին: Նա  ինձ համար հիանալի օրինակ է: Ցանկանում եմ տիտղոս նվաճել և հաջողության հասնել հավաքականի հետ: Իսկ անհավանական երազանքներիցս է «Մանչեսթեր Յունայթեդում» հայտնվելը. դա ինձ համար ամենաիրական հեքիաթը կլիներ»: