Ղարաբաղյան հակամարտությունը պետք է լուծվի Մինսկի խմբի շրջանակներում. ԵՄ դեսպան

ԵԱՀԿ Մինսկի խմբի համանախագահները բոլոր ջանքերը գործադրում են ղարաբաղյան հակամարտության կարգավորման համար: Հակամարտությունը պետք է լուծվի այս շրջանակում: Նման տեսակետ մայիսի 21-ին Երևանում ընթացող Եվրոպական միության ընդլայնման 10-րդ տարեդարձին նվիրված հանրային քննարկում ժամանակ հնչեցրեց Հայաստանում ԵՄ պատվիրակության ղեկավար, դեսպան Թրայան Հրիսթեան' ի պատասխան հարցին, թե Եվրամիությունը ինչ քայլեր է ձեռնարկում ղարաբաղյան հակամարտության կարգավորման համար: Դեսպանն ընդգծեց, որ ԵՄ-ն մշտապես ջանքեր է գործադրում, փորձում վստահություն ու պայմաններ ստեղծել, որոնք կնպաստեն հակամարտության՝ գոյություն ունեցող ձևաչափով կարգավորմանը: «Սակայն բուն կարգավորման գործընթացը վերապահված է ԵԱՀԿ Մինսկի խմբին: Հրադադարի կնքումից հետո ԵԱՀԿ ՄԽ-ն է զբաղվում հակամարտության կարգավորման հարցով, և խնդրի կարգավորումը այդ կառույցի շրջանակում է»,- ասաց դեսպանը:

Քննարկմանը ներկա ՀՀ-ում Ֆրանսիայի դեսպան Անրի Ռենոն էլ փաստեց, որ Եվրամիությունը սատարում է Մինսկի խմբի քայլերին` հակամարտությունը կարգավորելու ուղղությամբ և բազմիցս հայտարարել է, որ հակամարտության կարգավորումը ՄԽ ձևաչափով պետք է կայանա:

ԼՂ հակամարտության կարգավորման համար հրադադարից հետո Մինսկում ձևավորվեց խումբ, որտեղ ընդգրկվեցին Ռուսաստանի, Ֆրանսիայի և ԱՄՆ-ի ներկայացուցիչները: Շուրջ 20 տարի ԵԱՀԿ Մինսկի խմբի համանախագահները պարբերաբար այցելում են տարածաշրջան, հանդիպում երեք երկրների նախագահներին և քննարկում հակամարտության կարգավորումը: