«Երրորդն ավելորդ է, ինչո՞ւ հրավիրեն». Արմեն Ռուստամյանը՝ Գագիկ Ծառուկյան - Լևոն Տեր - Պետրոսյան հանդիպման մասին (տեսանյութ)

«Թե ինչ ունեն քննարկելու, իրենցից հարցրեք: Մենք չենք ունեցել այդպիսի պայմանավորվածություն: Չենք մասնակցել, բայց դա նորմալ ենք համարում, որևէ արտառոց չկա. քաղաքական ուժերը կարող են բազմիցս իրար հետ հանդիպել տարբեր ձևաչափով», - այս մասին Լուրեր.com-ի հետ զրույցում ասաց ՀՅԴ խմբակցության ղեկավար Արմեն Ռուստամյանը` անդրադառնալով Գագիկ Ծառուկյան - Լևոն Տեր -Պետրոսյան հանդիպմանը:

«Երկուսով հավաքվում են, երրորդն ավելորդ է. ինչո՞ւ հրավիրեն: Երբ պետք լինի, երեքով կկանչեն, կհավաքվեն», - ասաց Ռուստամյանը:

Անդրադառնալով այն տեսակետներին, թե քառյակից երկու ուժեր փորձում են իրենց ձեռքը վերցնել քառյակի ղեկավարումը, Արմեն Ռուստամյանն ասաց, որ այդ տեսակետներին իրենք վաղուց են ծանոթ:

«Հայ ժողովրդի պատմության մեջ ուզում է` եռյակ առաջանա, ուզում է` քառյակ, առաջին գործն անում են այն ուղղությամբ, որ դա տրոհվի, ոչ մի միասնություն չառաջանա: Բոլոր այդ տիպի դատողություններն ուղղված են դրան, և մենք դա ի սկզբանե իմանալով` ասել ենք, որ գոյություն չունի կարծր ձևաչափ «քառյակ» անունով. քառյակ են այնքանով, որքանով համաձայն են չորսը, եռյակ է, երբ երեքն են համաձայն: Մնացած բոլոր ձևաչափերը շատ հնարավոր է` գործեն, եթե համաձայնություն կա, իսկ եթե չկա, բոլոր քաղաքական ուժերն էլ ազատ են ինքնուրույն իրենց ճակատագիրը տնօրինելու, - ասաց Ռուստամյանը: