ՊԵԿ-ը կանոնակարգում է էլ.հաշվետվությունների համակարգը կուտակային պարտադիր վճարներից հրաժարվելու դիմումներին ընթացք տալու համար

Պետական եկամուտների կողմիտեի կողմից այս պահին աշխատանքներ են իրականացվում էլեկտրոնային հաշվետվությունների համակարգը կանոնակարգելու ուղղությամբ, որպեսզի համապատասխան ընթացք տրվի այն քաղաքացիների դիմումներին, ովքեր հրաժարվելու են կուտակային պարտադիր վճարներից: Այս մասին Ազգային ժողովում կառավարության հետ հարց ու պատասխանի ժամանակ նշեց ՀՀ աշխատանքի և սոցիալական հարցերի նախարար Արտեմ Ասատրյանը՝ պատասխանել ով ՀՅԴ խմբակցության պատգամավոր Արծվիկ Մինասյանի հարցին:

«Վերջերս խորհրդարանի կողմից վավերացված նախագծով `այն վարձու աշխատողները, ովքեր չեն ցանկանա, որպեսզի իրենց աշխատավարձից պահվեն կուտակային պարտադիր վճարները, կարող են համապատասխան դիմում գրել գործատուին և հրաժարվել համակարգին մասնակցելուց: Հաշվի առնելով այս հանգամանքը՝ վարչապետի հանձնարարականով ՊԵԿ-ը էլեկտրոնային հաշվետվությունների համակարգի կանոնակարգման աշխատանքներ է իրականացնում, որպեսզի այդ դիմումներին համապատասխան ընթացք տրվի»,- ասաց Ասատրյանը:

Անդրադառնալով կրթության նախարարության ենթակայության տակ գտնվող կառույցներին նախարարի հղած շրջաբերականին՝ Արտեմ Ասատրյանը վստահեցրեց, որ նման շրջաբերականներ այլևս չեն կրկնվի: