Առանց չափազանցության՝ տնտեսական ավերակներ

Ազգային ժողովում այսօր շարունակվեց կառավարության ծրագրի քննարկումը: Ելույթով հանդես եկավ ԲՀԿ խմբակցության պատգամավոր Ստեփան Մարգարյանը:

Վերջինիս կարծիքով՝ կառավարության ծրագրի այս քննարկումը տարբերվում է նախորդ քննարկումներից:

«Մինչև 2008 թվականը` Տիգրան Սարգսյանի վարչապետությամբ կառավարության ձևավորումը, երկիրը բոլոր պաշտոնական ցուցանիշների համաձայն զարգանում էր երկնիշ տնտեսական աճով, ընդ որում` 2008-ի ձևավորված կառավարությունը սկզբնական շրջանում ընդունում էր այդ ցուցանիշները, փնովելը սկսեցին ավելի ուշ: Տիգրան Սարգսյանի վարչապետությամբ ձևավորված կառավարությունը շատ արագ սկսեց ձախողումները և ի վերջո բառի բուն իմաստով ավերեց երկիրը, տնտեսությունը: Մենք ստացանք մի վիճակ, որ նույնիսկ ամենամեծ ցանկության դեպքում դժվար է գնահատել այլ կերպ, քան լուրջ սպառնալիք ազգային անվտանգությանը»,- ասաց Մարգարյանը` հավելելով, որ այսօրվա կառավարությունը ստանում է շատ ծանր ժառանգություն, առանց չափազանցության` տնտեսական ավերակներ:

«Հուսով եմ` ասածս չի օգտագործվի հետագայում հնարավոր տապալումների դեպքում արդարանալու համար: Ես կարծում եմ, որ առաջին հերթին անհրաժեշտ է պատասխանել այն հարցին, թե այդ ինչպես ստացվեց, որ երկնիշ տնտեսական աճից հետո ունեցանք ավերակներ: Ի վերջո, ո՞վ կամ ովքե՞ր են մեղավոր ստեղծված իրավիճակի համար: Առանց այս հարցին պատասխանելու` մենք չենք կարող առաջ գնալ: Դժվար է հաղթահարել իրավիճակ` առանց վերլուծելու և գնահատական տալու այն ծնող պատճառներին, երևույթներին և անձանց:

Այսօրվա կառավարության ծրագրում բացակայում է որևէ վերլուծություն, որևէ գնահատական առկա իրավիճակին: Եթե գնահատականներ չենք տալիս, ապա որտե՞ղ է նույնը չկրկնելու երաշխիքը, գոնե չե՞նք ասելու, թե ինչ ենք ուզում շտկել»,- ասաց ԲՀԿ-ական պատգամավորը: