Մամիկոն Խոջոյանի դիահերձման արդյունքները պաշտոնապես կհրապարակվեն

Վերին Կարմիրաղբյուրի գյուղի բնակիչ, ադրբեջանական գերությունում գտնված Մամիկոն Խոջոյանի դիահերձումից հետո բոլոր արդյունքները պաշտոնապես կհրապարակվեն: Այդ մասին ՀՀ կառավարության նիստից հետո լրագրողների հետ զրույցում հայտարարեց Առողջապահության նախարար Արմեն Մուրադյանը՝ անդրադառնալով այն պնդումներին, որ Ադրբեջանում հնարավոր է նրա մարմնում կերոսին են ներարկել: «Խոջոյանին խոշտանգելու փաստը հայտնի է, նրա ն Հայաստան էին վերադարձրել բազկի վնասվածքով: Վիրահատվել էր, ապրիլի 3-ին դուրս էր գրվել հիվանդանոցից, ինչից հետո մշտապես գտնվել է բժիշկների հսկողության ներքո: Վերջին երեք շաբաթվա ընթացքում երեք անգամ նրան բժշկական խումբ է այցելել՝ բաղկացած նյարդաբանից, թերապևտից և վիրաբույժից: Խոջոյանը եղել է նաև բուժքրոջ ամենօրյա ուշադրության կենտրոնում»,- ասաց նախարարը:

Մուրադյանի խոսքով՝ Խոջոյանի հարազատներին առաջարկվել էր, որպեսզի ծերունին տեղափոխվի հիվանդանոց, սակայն հարազատները հրաժարվել են: Առողջապահության նախարարը նշեց, որ ապրիլի 20-ին՝ ժամը 19:15-ին, հարազատների կողմից ահազանգ է եղել, ինչից հետո շտապ օգնությունը, չնայած 12 կմ հեռավորությանը, 15 րոպեում հասել է Կարմիրաղբյուր գյուղ, սակայն Խոջոյանն արդեն մահացած է եղել: