Դավիթ Հարությունյանն իր ունեցվածքը ձեռք է բերել մինչև նախարար դառնալը

Հայաստանի Հանրապետության կառավարության աշխատակազմի ղեկավար-նախարար Դավիթ Հարությունյանը պարզաբանել է իր ունեցվածքի վերաբերյալ խոսակցությունները: Ազգային ժողովում լրագրողների հետ զրույցում Դավիթ Հարությունյանը նշեց, որ Մոսկվայի իր բնակարանը կտակել է տատիկը, իսկ Դիլիջանում 800 քմ տարածքը գնել է աճուրդի ժամանակ, որին մասնակցել են բազմաթիվ այլ քաղաքացիներ ևս: «Այն տունը, որտեղ ես այժմ ապրում եմ` Դավթաշենում, ա յդ հողատարածքն ընդհանրապես գնել եմ շատ ավելի վաղ` մինչև նախարար դառնալը, և դարձյալ գնել եմ աճուրդով»,- ասաց Դավիթ Հարությունյանը` վստահեցնելով, որ իր այդ ունեցվածքն ինքը ձեռք է բերել այն ժամանակ, երբ ինքը ո′չ նախարար է եղել, ո′չ էլ նախարարի տեղակալ:

Ինչ վերաբերում է «Էյր Արմենիա» ավիաընկերությանը, Դավիթ Հարությունյանը չհերքեց, որ իր եղբայրն այդ ընկերությունում մասնաբաժին ունի, սակայն անձամբ ինքը տվյալ ընկերության հետ որևէ առնչություն չունի:

«Հյուսիսային պողոտայի հետ էլ որևէ առնչություն չունեմ և չեմ ունեցել, որևէ սեփականություն Հյուսիսային պողոտայում չունեմ»,- ասաց նախարարն ու անդրադարձավ նաև Զանգեզուրի պղնձամոլիբդենային կոմբինատում իր դերակատարությանը` նշելով, որ Զանգեզուրում եղել է մանկության տարիներին, իսկ արդեն հասուն տարիքում եղել է ի պաշտոնե` որպես արդարադատության նախարար, մյուս նախարարների հետ միասին: «Որևէ մասնակցություն, որևէ գործարք, լինի դա պայմանագրային ծառայությունների մատուցման, որևէ փոխպակացված անձի միջոցով չունեմ և չեմ ունեցել»,- հավաստիացրեց Հարությունյանը: