«Կառավարության ծրագրի քվեարկությանը չմասնակցելով` ոչ իշխանական ուժերը միմյանցից քաշվել են». Հովիկ Աբրահամյան

Հովիկ Աբրահամյանը մեկնաբանել է, թե որն է պատճառը, որ ոչ իշխանական ուժերը չեն մասնակցել ԱԺ-ում կառավարության ծրագրի քվեարկությանը: ՀՀԿ գործադիր մարմնի նիստից առաջ լրագրողների հետ զրույցում ՀՀ վարչապետը նշեց, որ նրանք ուղղակի չեն ցանկացել «ոչ» ասել կառավարության ծրագրին, և նաև չէին կարող ասել' «այո»: «Երևի մեկը մյուսից քաշվում են: Մտածել են, որ կասեն դավաճան են և այլն»,- ասաց ՀՀ վարչապետը՝ պատասխանեով հարցին, թե ինչու այդ ուժերը չէին կարող կողմ քվեարկել կառավարության ծրագրին:

Նա չհամաձայնեց դիտարկման հետ, թե ոչ իշխանական ուժերը բոյկոտել են քվեարկությունը՝ ընդգծելով, որ դա բոյկոտ չէր, այլ ուղղակի նրանք չեն մասնակցել քվեարկությանը: «Դա բոյկոտ չէր, բոյկոտն այլ կատեգորիա է»,- ասաց Հովիկ Աբրահամյանը՝ չհամաձայնելով նաև այն դիտարկման հետ, թե կառավարության ծրագիրը սուր քննադատության է ենթարկվել ոչ իշխանական ուժերի կողմից:

Հարցին, թե միմյանցից քաշվելը նշանակու՞մ է, որ քառյակում խնդիրներ կան, Հովիկ Աբրահամյանը պատասխանեց. «Չգիտեմ, ես չեմ ցանկանում, որ խնդիրներ լինեն: Թող հանգիստ աշխատեն»: Իսկ դիտարկմանը, թե ինքն ակնարկեց այդ մասին՝ ընդգծելով, որ քվեարկության հարցում միմյանցից քաշվել են, Հովիկ Աբրահամյանը պատասխանեց, որ ինքն ուղղակի իր կարծիքն է հայտնել, թե ինչու չեն մասնակցել քվեարկությանը: