ԱՄՆ-ում ինքնաթիռը վայրէջք է կատարել ճաքած դիմապակիով

U.S. Airways ավիաընկերության ինքնաթիռը Ֆիլադելֆիայի միջազգային օդանավակայանում վայրէջք է կատարել ճաքած դիմապակիով: Այդ մասին մայիսի 23-ին հաղորդել է CBS հեռուստաալիքը:

Օդանավակայանի ներկայացուցիչները հայտնել են, որ Airbus 320 հանրանավում, որը մայիսի 22-ին օդ է բարձրացել Օռլանդոյից (Ֆլորիդայի նահանգ), եղել է 155 մարդ՝ 150 ուղեւոր եւ անձնակազմի հինգ անդամ: Ֆիլադելֆիայում վայրէջքի ժամանակ նրանցից ոչ ոք չի տուժել:

Նշվում է, որ ինքնաթիռը վայրէջքամուտն սկսել է սաստիկ կարկուտի ժամանակ, ինչն էլ, հավանաբար, ապակու վնասման պատճառ է դարձել:

Ընկերության աշխատակիցները քննում են միջադեպի հանգամանքները, հաղորդել է ՌԻԱ Նովոստին: