Կապանցի երիտասարդները կոտրում են ծխելու վերաբերյալ կարծրատիպերը

Սյունիքի մարզի Կապան քաղաքում անց է կացվում «Առողջ կենսակերպը առողջ երիտասարդության գրավական» խորագրով ծրագիրը: Ինչպես տեղեկացնում են ՀԵՀ հասարակայնության հետ կապերի վարչությունից, ծրագրի շրջանակներում ապրիլ-հոկտմբեր ամիսներին ծխախոտի օգտագործման դեմ պայքարի շրջանակներում կիրականացվեն հանրության իրազեկմանն ուղղված տարաբնույթ միջոցառումներ, տեղեկատվական դասընթացներ:

Ծրագրի առաջին փուլում Մեղրի, Ագարակ, Սիսիան և Կապան քաղաքների երիտասարդների շրջանում իրականացվել է հարցում. լրացվել է 500 հարցաթերթիկ: Կապանի բարձրագույն և միջին մասնագիտական հաստատությունների 150-ից ավելի երիտասարդների շրջանում անց են կացվել «Լինենք իրազեկ» թեմայով դասընթացներ, որոնց ընթացքում երիտասարդներին տրվել են իրավական և առողջապահական գիտելիքներ ծխախոտի վնասակար ազդեցության վերաբերյալ: Այժմ նախապատրաստվում են տեղեկատվական թռուցիկներ, բաներ, որը փակցվելու է Կապանում, կկազմակերպվեն բանավեճ-քննարկումներ, կստեղծվեն սոցիալական գովազդներ, տեսաֆիլմեր, որոնք պարբերաբար կցուցադրվեն տեղական՝ քաղաքային և մարզային՝ հեռուստաալիքներով:

Ծխախոտի օգտագործման և երկրորդային ծխի վնասակար ազդեցությունների վերաբերյալ տեղեկատվական դասընթացներում որպես թիրախ խումբ ընտրվել են 15-24 տարեկան երիտասարդները: Ծրագրի համակարգող Լուսինե Սարուխանյանն այս առիթով նշել է. «Սա ամենաակտիվ տարիքն է, և տարբեր հետազոտություններ ցույց են տվել, որ այդ տարիքում են երիտասարդներն առաջին անգամ փորձում օգտագործել ծխախոտ' առանց գիտակցելու դրա հետևանքները: Այդ տարիքի երիտասարդները ծխելը հաճախ կապում են ինքնարտահայտման հետ: Ուստի երիտասարդների այդ խումբն է ընտրվել, որպեսզի նրանց տեղեկություննե ր տրվեն այն մասին, որ ծխելը ինքնարտահայտման հետ կապ չունի»:

Լուսինե Սարուխանյանը վստահեցրել է, որ ծրագրի իրականացմամբ նաև կարծրատիպեր են կոտրելու: «Մեր նպատակն է բարձրացնել երիտասարդների իրազեկվածության աստիճանը ծխախոտի և երկրորդային ծխի վնասների, վերարտադրողական առողջության վերաբերյալ: Ակնկալում ենք, որ երիտասարդները ծրագրի ավարտին կունենան համապատասխան իրավական և առողջապահական գիտելիքներ ու չեն առաջնորդվի այն կարծրատիպով, թե ծխելը կապ ունի ինքնադրսևորման, ինքնարտահայտման ու ինքնահաստատման հետ»:

Ծրագրի շրջանակներում նախատեսվում է Կապանում հիմնել Երիտասարդների զարգացման կենտրոն, որտեղ «Առողջ կենսակերպը առողջ երիտասարդության գրավական» ծրագրի մասնակիցները մարզի մյուս երիտասարդներին կփոխանցեն ձեռք բերած գիտելիքները:

Ծրագիրն իրականացնում է «Երիտասարդական գիտամշակութային» ՀԿ-ն' ՀԵՀ-ի' որպես ՀՀ նախագահի գործընկեր կազմակերպության կողմից հայտարարված դրամաշնորհային մրցույթի շրջանակներում' «Հանրության իրազեկում ծխախոտի օգտագործման և երկրորդային ծխի վնասակար ազդեցությունների վերաբերյալ» անվանակարգում: