Վերջին զանգը հուզմունք է. սցենար, շնորհակալություն, քեֆ, գուցե առաջին ծխախոտը, համբույրը և առաջին սիրո խոստովանությունը. Աշոտյան

Ջերմ խոսքեր, հուզիչ շնորհավորանքներ, բարձր տրամադրություն: Երևանի Բենջամին Ժամկոչյանի անվան թիվ 119 դպրոցում «Վերջին զանգը» վերածվեց տոնի: Մայիսի 23-ին անցկացված տոնական արարողությանը մասնակցեցին նաև ՀՀ վարչապետ Հովիկ Աբրահամյանը, Հայաստանի կրթության և գիտության նախարար Արմեն Աշոտյանը, ԱԺ պատգամավոր, Դպրոց-կենտրոնների միության նախագահ Ռուզաննա Մուրադյանը, ԿԳՆ հանրակրթության վարչության պետ Նարինե Հովհաննիսյանը և այլ պաշտոնատար անձինք: Նրանք մասնակցեցին տոնական ցերեկույթին, որի ընթացքում դպրոցի տաղանդաշատ երեխաները ցույց տվեցին իրենց շնորհքը' երգեցին, պարեցին, ասմունքեցին: Վարչապետը և ԿԳ նախարարը ևս պարեցին դպրոցականների հետ, նրանց հետ կիսեցին իրենց հույզերը: Դպրոցականները բանաստեղծություններ ձոնեցին պաշտոնյաներին և անակնկալ նվերներ հանձնեցին նրանց:

Դպրոցի տնօրեն Հովհաննես Կարապետյանն իր շնորհավորանքներն ուղղեց կրթօջախն ավարտող պատանիներին' ընթերցելով Գրիգոր Նարեկացու պատգամները:

«Իմ կարծիքով, ես եկել եմ այստեղ ողջունելու մեր ապագա նախարարներին, վարչապետներին, նախագահներին, պատգամավորներին: Ես իրոք հպարտ եմ մեր ապագա սերնդով, որպես երկրի վարչապետ շատ ուրախ եմ, որ ունենք նման աշակերտներ, որոնք իրենց գիտելիքներով զարմացնում են մեզ: Մենք ձեզ շատ ենք սիրում, սիրելի մանկավարժներ և մեր ապագան կապում ենք ձեզ հետ»,- նշեց ՀՀ վարչապետ Հովիկ Աբրահամյանը:

Հովիկ Աբրահամյանը հորդորեց բոլորին' լավ սովորել: Վարչապետը նշեց, որ դպրոցական տարիներն իր համար ամենահիշարժանն են եղել: «Համոզված եմ, որ, եթե աշակերտները լսեն իմ հորդորը, անպայման շատ լավ կսովորեն: Այսօր հնարավորություններն ավելի մեծ են' գիտելիք ձեռք բերելու համար: Մենք որպես իշխանություն ամեն ինչ պետք է անենք, որպեսզի մեր ապագա սերնդի համար կրթվելու և դաստիարակվելու հնարավորություններ ստեղծենք: Հավատում, որ Հայաստանի և Արցախի Հանրապետություններն ունենալու են պայծառ ապագա: Ունենալու ենք հզոր Արցախ և հզոր Հայաստան»,-հավելեց Հովիկ Աբրահամյանը:

ՀՀ կրթության և գիտության նախարար Արմեն Աշոտյանը լրագրողների հետ զրույցում անկեղծացավ, որ սովորել է երկու դպրոցներում: «Սկզբում սովորում էի ռուսական դպրոցում, հետո տեղափոխվեցի հայկական դպրոց: Այդ տեսակետից իմ բախտը բերեց, որովհետև երկու վերջին զանգ եմ ունեցել' երկու ավարտական երեկո: Վերջին զանգը հուզմունք է. սցենար, շնորհակալություն, քեֆ, գուցե առաջին ծխախոտը, համբույրը և առաջին սիրո խոստովանությունը»,- նշեց Արմեն Աշոտյանը:

Աշոտյանը բոլորին հորդորեց ուշադիր լինել, որ աշակերտների հետ ոչինչ չպատահի: Նա շնորհակալություն հայտնեց ՀՀ ոստիականությանը աջակցության համար: «Մենք իրենց խնդրել ենք խիստ լինել, անսթափ վիճակում եղած ոչ մի վարորդի չեն ներելու»,- հավելեց նախարարը:

Նախարարն ընդծեց, որ ավարտական արարողություններ են անցկացվում ոչ միայն դպրոցներում, այլև քոլեջներում և ուսումնարաններում: «Շուրջ 35-37 հազար ավարտողներ ունենք տարբեր հաստատություններում: Արդեն ունենք 14 հազարից ավելի դիմորդներ, հայտագրումը շարունակվում է: Մենք խոստացել ենք հեշտ, արդար ու ազնիվ քննություններ»,- հավելեց նախարարը:

Աշոտյանն ընդգծեց, որ դրամահավաքություն կար տարբեր ժամանակներում: «Այլանդակությունն այն է, որ դրամահավաքությունը դառնում է կաշառքի բուն»,-փաստեց նախարարը:

Դպրոցի աշակերտներից շատերն ընդգծեցին, որ հուզված են այս կարևոր պահին, և շնորհակալական խոսքեր ուղղեցին իրենց ուսուցիչներին և դպրոցին:

Հայաստանի հանրակրթական դպրոցների 25 հազար աշակերտների համար այս տարի մայիսի 23-ին կհնչի Վերջին զանգը' ազդարարելով նոր կյանքի սկիզբ: Այս տարի ևս դպրոցն ավարտող աշակերտների համար կկազմակերպվեն տարատեսակ միջոցառումներ: Վերջին դասեր կանցկացվեն տարբեր դպրոցներում, այնուհետև Ազատության հրապարակում ՀՀ ԿԳՆ և Երևանի քաղաքապետարանի նախաձեռնությամբ ժամը 19:00-ին տեղի կունենա տոնական համերգ, ինչպես նաև հրավառություն: