Ճարտարապետները մտահոգված են. Մարզահամերգային համալիրի աճուրդի պայմանագրում նշված չէ, որ կառույցը մշակութային հուշարձան է

Ճարտարապետներ Սաշուր Քալաշյանն ու Գուրգեն Մուշեղյանը դեմ չեն Մարզահամերգային համալիրի աճուրդին: Աճուրդն ընդամենը իրավական գործընթաց է, կարևորը հուշարձանի պահպանությունն է, որը Հայաստանի միակ կառույցն է, որ արժանացել է ԽՍՀմ պետական մրցանակի: «Արմենպրես»-ի հարցին ի պատասխան ճարտարապետները շեշտում են, որ աճուրդի պայմանագրում որևէ կետով նշված չէ, որ համալիրը ճարտարապետական հուշարձան է, ընդգրկված է պետական հուշարձանների ցանկում, և նոր գնորդը պետք է ստանձնի կառույցի պահպանման պարտավորությունը: «Նոր գնորդը, ով էլ որ լինի, պետք է մշակույթի նախարարության հետ պայմանագիր կնքի, որով հաստատի, որ ստանձնում է պարտավորություն կատույցի համար»,- ասաց Գուրգեն Մուշեղյանը' հավելելով, որ իրենք մտահոգված են, քանի որ նախորդ փորձերը' գնումներն ու վաճառքները վատ ավարտ են ունեցել ճարտարապետական այլ կառույցների համար:

Ըստ Սաշուր Քալաշյանի էլ, անհրաժեշտ է նաև ճշտել գնորդի նպատակը, արդյոք նա համալիրը պահելու պայմաններ ունի՞ և ի՞նչ նպատակով է ցանկանում գնել կառույցը: Ճարտարապետները մարզահամերգային համալիրի նախկին սեփականատերից դժգոհ չեն: Տեղյակ չեն' Մշակույթի նախարարության հետ կնքվե՞լ է պայմանագիր, որով պետք է կառույցի պահպանման պարտավորություն ստանձնվի թե ոչ, սակայն ԲԱՄՈ-ն ոչ միայն պահպանել է կառույցը, այլև հսկայական ներդրումներ կատարել համալիրը վերանորոգելու համար:

Կարեն Դեմիրճյանի անվան մարզահամերգային համալիրը հանվել է աճուրդի: Աճուրդը մեկնարկել է մայիսի 19-ին, կավարտվի 29-ին: Շինության աճուրդի համար ընթացիկ առաջարկը 19 միլիարդ 350 միլիոն դրամ է, նախավճարը' 967 միլիոն 500 հազար դրամ, առաջարկի քայլը' 100 հազար դրամ: