Հասմիկ Պողոսյանն ուրախ է, որ «Վերջին զանգ» կազմակերպելու ավանդույթը պահպանվում է

Երևանի Չայկովսկու անվան երաժշտական միջնակարգ մասնագիտական դպրոցում տոնական եռուզեռ էր: Դպրոցի մի քանի տասնյակ աշակերտների համար մայիսի 23-ին հնչեց Վերջին զանգը: Դպրոցի դահլիճում հանկարծ «կենդանություն առան» Մոցարտը, Բախը, Շոպենը, Խաչատրյանն ու Չայկովսկին, ովքեր ոչ միայն ցուցադրեցին իրենց տաղանդը, այլև ողջույնի և շնորհակալության խոսքեր ուղղեցին իրենց սիրելի մանկավարժներին: Մեկ այլ դասարան կազմակերպել էր մրցանակաբաշխություն. պարգևատրվում էին երաժշտարվեստի լավագույն ներկայացուցիչները` դասարանի աշակերտները:

Տոնական եռուզեռին մասնակցեց նաև ՀՀ մշակույթի նախարար Հասմիկ Պողոսյանը: «Արմենպրես»-ի թղթակցի հետ զրույցում նախարարը վերհիշեց իր «Վերջին զանգը»:

«Հիշում եմ, թե ինչպես էին մենք օր ու գիշեր նախապատրաստվում, հավաքվում էինք մեր դասարանցիների տներում և մինչև ուշ գիշեր քննարկում էինք սցենարը: Փորձել էինք ներկայացնել յուրաքանչյուրիս ապագա մասնագիտությունը' հումորային ձևով: Այդ նյութն օգտագործեցինք «Վերջին զանգի» արարողության ընթացքում: Մենք, իհարկե, մինչև հիմա անդրադառնում ենք այդ օրվան, երբ դասարանով հավաքվում ենք, որովհետև մենք բոլորս ի վերջո ստացանք այն մասնագիտությունները, որոնք ենթադրում էինք: Այդ օրը քո կյանքում իսկապես բեկումնային է, դու ձևավորված, կայացած անձնավորություն ես, և պետք է մտնես նոր կյանք: Այդ երջանկության և տխրության խառնուրդը քո մեջ ինչ-որ բնորոշում է ստանում, որը չես կարող որևէ բառով վերարտադրել»,- նշեց Հասմիկ Պողոսյանը:

ՀՀ մշակույթի նախարարն ընդգծեց, թե ուրախ է, որ «Վերջին զանգի» ավանդույթը պահպանվում է: «Ժամանակը չի ազդում այս ավանդույթի վրա: Կարծես թե երեխաները հիմա պետք է այդքան հաճույքով շատ բաներ չանեն կամ էլ չփորձեն հաճոյանալ այն իմաստով, որ իրենց գնահատեն իրենց մանկավարժները: Բայց նույնն է: Այս օրը շարունակում է մնալ իր ավանդույթի մեջ, և դա ինձ շատ ուրախացնում է: Երեխաները գնահատում են ամեն ինչ և շնորհակալություն են հայտնում իրենց ծնողներին և մանկավարժներին, որոնց շնորհիվ հասել են այս օրվան»,-եզրափակեց նախարարը:

Դպրոցն ավարտողները հուզված էին և միևնույն ժամանակ երջանիկ, քանի որ թևակոխում են իրենց համար նոր փուլ:

Հայաստանի հանրակրթական դպրոցների 25 հազար աշակերտների համար այս տարի մայիսի 23-ին կհնչի «Վերջին զանգը»` ազդարարելով նոր կյանքի սկիզբ: Այս տարի ևս դպրոցն ավարտող աշակերտների համար կկազմակերպվեն տարատեսակ միջոցառումներ: Վերջին դասեր կանցկացվեն տարբեր դպրոցներում, այնուհետև Ազատության հրապարակում ՀՀ ԿԳՆ և Երևանի քաղաքապետարանի նախաձեռնությամբ ժամը 19:00-ին տեղի կունենա տոնական համերգ, ինչպես նաև հրավառություն: