Օպերային երգիչ Վահան Միրաքյանին վերջին հրաժեշտը կկայանա մայիսի 26-ին

Կյանքի 79-րդ տարում վախճանված, Հայաստանի ժողովրդական արտիստ, օպերային հանրահայտ երգիչ Վահան Միրաքյանի վերջին հրաժեշտը տեղի կունենա մայիսի 26-ին: Ինչպես տեղեկացրեցին Միրաքյանի հուղարկավորությունը կազմակերպելու համար ձեւավորված Կառավարական հանձնաժողովից, հրաժեշտի արարողությունը կկայանա Երևանի Կոմիտասի անվան կամերային երաժշտության տանը, ժամը 12:00-14:00-ն: Հուղարկավորությութը կկայանա նույն օրը, Երևանի քաղաքային պանթեոնում:

Վահան Միրաքյանի աստղը փայլել է անցյալ դարի 50-70-ական թվականներին: Նրա մարմնավորած յուրաքանչյուր նոր դերերգ դառնում էր երաժշտագետների ու թատերագետների, ինչպես նաև օպերային արվեստի երկրպագուների հիացմունքի ու գնահատանքի առիթ:

Նրա համբավը շատ արագ դուրս եկավ Հայաստանի սահմաններից, նշանավոր տենորը շրջագայեց բազմաթիվ երկրներում' գրանցելով մեծագույն հաջողություններ' տարածելով հայ վոկալ արվեստի փառքը Խորհրդային Միության, եվրոպական երկրներում, ինչպես նաև ԱՄՆ-ում, Կանադայում և Հարավային Ամերիկայում:

Միրաքյանն արժանացել է բազմաթիվ պարգևների ու մրցանակների, 1976 թ. նրան շնորհվել է ՀԽՍՀ ժողովրդական արտիստի բարձր կոչում:

1980-ականներից սկսած Վ. Միրաքյանն իր բեղմնավոր գործունեությունը շարունակեց Վիեննայում, ապա' ԱՄՆ-ում, որտեղ և կնքեց իր մահկանացուն: