Մունդիալ 2014-ին ընդառաջ. ԻՍՊԱՆԻԱ

Հարավաֆրիկյան Հանրապետությունում 2010 թվականի Մունդիալը ոսկե տառերով գրվեց Իսպանական ֆուտբոլի պատմության մեջ: Իսպանացիները Մունդիալի ֆավորիտի կոչման համար «աշխատել էին» դեռևս 2008 թվականից, երբ նվաճեցին Հին մայրցամաքի ուժեղագույն հավաքականի տիտղոսը: Սակայն, որքան էլ որ զարմանալի էր, առաջնության հենց առաջին իսկ խաղում նրանք նվազագույն հաշվով պարտվեցին շվեյցարացիներին: Սա միաժամանակ հաստատեց տարածված այն կարծիքը, որ ֆուտբոլը գեղեցիկ է անսպասելիությամբ և անկանխատեսելիությամբ:

Հետաքրքրական է, որ իսպանացիները խմբային փուլի երեք խաղերում խփել էին 4 և բաց թողնել միայն 1 գնդակ: Իսկ 1/8, քառորդ, կիսաեզրափակիչ և եզրափակիչ խաղերի ընթացքում «Կարմիր ֆուրիան» խփեց միայն 4 գնդակ (մեկական գնդակ յուրաքանչյուր խաղում), անառիկ պահելով սեփական դարպասը:

Իսպանացիների մունդիալյան երազը սկսվեց 1934 թվականի աշխարհի առաջնությունից: «Կարմիր ֆուրիան» քառորդ եզրափակչում պայքարը զիջեց ապագա չեմպիոն Իտալիայի հավաքականին: Բաց թողնելով ևս մեկ Մունդիալ, իսկ հետո` 1950 թվականի բրազիլական առաջնությունում Իսպանիայի հավաքականն արդեն չորրորդ տեղում էր: Հասնելով նման բարձունքի, իսպանացիները հաջորդ երկու ԱԱ-ում անգամ չորակավորվեցին: 1962, 1966 թվականներին անցկացված Մունդիալներում բավարարվեցին խմբային փուլով: 1970, 1974 թվականներին կրկին չանցան որակավորման փուլը: 1978 թվականից ի վեր իսպանացիները միշտ եղել են աշխարհի առաջնության հիմնական հյուրերից մեկը: 1986, 1994, 2002 թվականների առաջնություններում Պիրենեյան թերակղզու ֆուտբոլիստները հասան մինչև քառորդ եզրափակիչ:

ՖԻՖԱ-ի պատմության մեջ բացառիկ փաստ է այն, որ, 2008 թվականին նվաճելով Եվրոպայի չեմպիոնի կոչումը Իսպանիայի հավաքականը դարձավ ՖԻՖԱ-ի վարկանիշային աղյուսակի առաջատարը: Սա միակ հավաքականն է, որը գլխավորում էր դասակարգման աղյուսակը' երբեևէ չհաղթելով աշխարհի առաջնություններում:

Իսպանիայի ազգային ներկայիս հավաքականի կազմում ամենաշատ հանդիպումն անցկացրել է թիմի ավագ և դարպասապահ Իկեր Կասիլիասը, իսկ թիմի լավագույն ռմբարկուն Դավիթ Վիլյան է:

Աշխարհի գործող չեմպիոններից կրկին լավագույնի կոչման համար կպայքարեն' դարպասապահներ. Իկեր Կասիլիաս («Ռեալ»), Խոսե Ռեյնա («Նապոլի»), Դավիդ դե Խեա («Մանչեսթեր Յունայթեդ»)։ Պաշտպաններ. Սեզար Ասպիլիկուետա («Չելսի»), Խերարդ Պիկե («Բարսելոնա»), Սերխիո Ռամոս («Ռեալ»), Խորդի Ալբա («Բարսելոնա»), Ալբերտո Մորենո («Սեւիլիա»), Խավի Մարտինես («Բավարիա»), Ռաուլ Ալբիոլ («Նապոլի»), Խուանֆրան («Աթլետիկո»), Դանիել Կարվախալ («Ռեալ»)։ Կիսապաշտպաններ. Սերխիո Բուսկետս («Բարսելոնա»), Խաբ ի Ալոնսո («Ռեալ»), Կոկե («Աթլետիկո»), Անդեր Իտուրասպե («Աթլետիկ»), Չավի («Բարսելոնա»), Տիագո Ալկանտարա («Բավարիա»), Պեդրո Ռոդրիգես («Բարսելոնա»), Դավիդ Սիլվա, Խեսուս Նավաս (երկուսն էլ՝ «Մանչեսթեր Սիթի»), Խուան Մատա («Մանչեսթեր Յունայթեդ»), Սանտի Կասորլա («Արսենալ»), Անդրես Ինյեստա, Ֆրանսեսկ Ֆաբրեգաս (երկուսն էլ՝ «Բարսելոնա»)։ Հարձակվողներ. Դիեգո Կոստա, Դավիդ Վիլյա (երկուսն էլ՝ «Աթլետիկո»), Ֆերնանդո Տորես («Չելսի»), Ալվարո Նեգրեդո («Մանչեսթեր Սիթի»), Ֆերնանդո Լյորենտե («Յուվենտուս»)։ Թիմի գլխավոր մարզիչն է Վիսենտե դել Բոսկեն:

ՖԻՖԱ-ի վարկանիշային աղյուսակում արդեն երկար ժամանակ առաջատարը իսպանացիներն են:

ՖՈՒՏԲՈԼԻ ԱՇԽԱՐՀԻ ԱՌԱՋՆՈՒԹՅԱՆ ՄԵԿՆԱՐԿԻՆ ՄՆԱՑԵԼ է 18 ՕՐ: