Պորոշենկոն առաջին «նախագահական» խոստումներն է տվել Ուկրաինայի ժողովրդին

Միլիարդատեր Պյոտր Պորոշենկոն, որը, ըստ նախանական արդյունքների, հաղթանակ է տարել Ուկրաինայի նախագահական ընտրությունների առաջին փուլում, առաջին «նախագահական» խոստումներն է տվել հանրապետության ժողովրդին: Այս մասին հայտնում է ria.ru-ն:

Նա հայտարարել է, թե ընտրությունների արդյունքները վկայում են, որ Ուկրաինայի ժողովուրդն ընտրություն է կատարել հօգուտ եվրաինտեգրացման: «Այսօրվա դրությամբ Ուկրաինայի եվրոպական ձգտման իրագործումը չափազանց կարևոր է, և իշխանության բոլոր թևերը պետք է իրենց գործունեության մեջ ղեկավարվեն Ուկրաինայի այդ վճռական կամքով»,- ասել է նա:

Պորոշենկոն հույս է հայտնել, որ իր պաշտոնակալման արարողությունը տեղի կունենա հնարավորինս շուտ: «Կարծում եմ` շատ շուտով տեղի կունենա պաշտոնակալման արարողությունը: Մենք շատ աշխատանք ունենք անելու»,- նշել է նա: Դրա հետ մեկտեղ միլիարդատերը հայտարարել է, որ ինքը մտադիր է վաճառել իր բիզնեսը:

Պորոշենկոն ընդգծել է, որ այժմ գլխավոր խնդիրը խաղաղության ապահովումն է Ուկրաինայում: Դրա համար նա մտադիր է արդեն մոտ ժամանակներս ուղևորվել Դոնբաս: «Իմ առաջին այցը կլինի Դոնբաս, որպեսզի խոսեմ մարդկանց հետ, այն մարդկանց հետ, ովքեր զենքի չեն դիմում և պատրաստ են բանակցել»,- հավելել է նա:

Պորոշենկոն վերստին հայտարարել է, որ երկրում անհրաժեշտ է անցկացնել վաղաժամկետ խորհրդարանական ընտրություններ: «Կարծում եմ` դրանք պետք է տեղի ունենան այս տարի»,- ասել է նա:

Ինչ վերաբերում է Ռուսաստանի հետ հարաբերություններին, ապա, Պորոշենկոյի կարծիքով, դրանք ամենաբարդն են վերջին երկու հարյուր տարվա ընթացքում: Դրա հետ մեկտեղ նա այն կարծիքին է, որ գոյություն ունեն ձևաչափեր, որոնք թույլ են տալիս լուծել Կիևի և Մոսկվայի միջև կուտակված հիմնախնդիրները:

Նախագահի կարգավիճակով իր առաջին արտասահմանյան այցը Պորոշենկոն մտադիր է կատարել Լեհաստան: «Առաջին այցը կարող է լինել ուղևորությունը Լեհաստան: Ես կմասնակցեմ Լեհաստանի ազատության 25-ամյակի տոնակատարությանը»,- ասել է նա: