ՀՀ նախագահի մրցանակին արժանացած հրեա գիտնականը կշարունակի պայքարը Հայոց ցեղասպանության ճանաչման համար

ՀՀ նախագահի 2013 թվականի մրցանակին արժանացած իսրայելցի գիտնական, պատմաբան պրոֆեսոր Յահիր Աուրոնն իր պարտականությունն է համարում Հայոց ցեղասպանության միջազգային ճանաչման ու դատապարտման համար պայքարը: Մայիսի 26-ին ՀՀ նախագահի նստավայրում, «Սիոնիզմը և Հայոց ցեղասպանությունը» գրքի ու տասնամյակների ընթացքում իրականացրած գիտական գործունեության համար ստանալով մրցանակը, այս մասին հայտնեց հրեա պատմաբանը: «Ինձ համար մեծ պատիվ է և մեծ պատասխանատվություն այսօր լինել այստեղ ձեզ հետ` Հայաստանի Հանրապետության նախագահ Սերժ Սարգսյան, վարչապետ, կառավարության անդամներ, հարգելի հյուրեր: Ես իսկապես զգացված եմ: Այսօր ես միացել եմ ձեզ որպես մարդ, որպես հրեա ու որպես իսրայելցի: Երբ իմ «քույրը»` իմ գրքի հիանալի հայերենի թարգմանչուհին, ինձ նամակ ուղարկեց` ասելով «եղբայրս, ես լավ նորություն ունեմ», ես լաց եղա: Ես շնորհակալ եմ Զորի Բալայանին (գրող, հրապարախակոս-խմբ.), Լևոն Անանյանին (Գրողների միության երջանկահիշատակ նախագահ-խմբ.) և շատ այլ հայորդի ների»,-«Արմենպրես»-ի հաղորդմամբ` ասաց Յահիր Աուրոնը:

Հրեա գիտնականը ցեղասպանությունների թեմայով զբաղված է ընդհանրապես, իսկ Հայոց ցեղասպանության թեման արդեն 25 տարի է` գտնվում է նրա ուշադրության կենտրոնում: «Իմ հետազոտություններն ինձ տարել են դեպի չնախատեսված վայրեր ու իրադարձություններ: Պետք է խոստովանեմ, որ դրանք բացահայտեցին բաներ, որոնք ես չէի սպասում: Ես հույս ունեի գտնել հայերի տանջանքների ավելի լայն ճանաչում, ավելի շատ կարեկցանք և օգնության ավելի մեծ ճիգեր` նույնիսկ հրեա ժողովրդի շատ սահմանափակ հնարավորությունների պարագայում: Դրա փոխարեն ես գտա մեծ անտարբերություն և մի վերաբերմունք, որն ավելի շատ շեշտում էր մասնավորը, քան համամարդկայինը: Հետազոտություններիս արդյունքները տպագրել եմ իմ 20 գրքերում»,-ավելացրեց իսրայելցի պրոֆեսորը:

Յահիր Աուրոնը խոսեց նաև հայ և հրեա ժողովուրդների ճակատագրի ընդհանուր գծերի մասին` հիշատակելով Շմուել Տալկովսկու և Ֆրանց Վերֆելի աշխատությունները:

Խոսելով Հայոց ցեղասպանությունն անտեսողների ու ժխտողների մասին` պրոֆեսոր Յահիր Աուրոնը համոզվածություն հայտնեց, որ նրանք, ովքեր կողքի են կանգնած, անուղղակիորեն աջակցում են մարդասպաններին և ոչ երբեք զոհերին: «Երբ մենք ընտրում ենք անտարբերությունը, մենք փաստորեն ագրեսորի կողմն ենք անցնում: Բարոյապես մենք չենք կարող պարապ նստել ու ընդունել այն փաստարկը, որ ոչինչ անել չենք կարող: Եկեք հիշենք, որ մեր ընդհանուր պայքարը Հայոց ցեղասպանության ճանաչման գործում, ինձ համար գոնե, ունի մեծ բարոյական նշանակություն, և որ մեր համատեղ բարոյական պայքարում մենք պետք է լինենք հետևողական»,-նշեց Յահիր Աուրոնը` հավելելով, որ ամեն մարդ ու ժողովուրդ, հատկապես, հայերն ու հրեաները, ունեն շարունակական պարտավորվածություն` երբեք նորից չդառնալ զոհ, երբեք չլինել հանցագործ ու անտարբեր:

Նրա տեղեկացմամբ` անցյալ ամիս Կնետեսի նախկին անդամ և նախկին նախարար Յահիր Զաբանին ու ինքը սկսել են հանրային քարոզարշավ Իսրայելի կողմից Հայոց ցեղասպանությունը ճանաչելու նպատակով: «Մենք խնդրում ենք մարդկանց ստորագրել հետևյալ տեքստի տակ. «Մենք կոչ ենք անում Իսրայելի կառավարությանը և Իսրայելի Կնեսետին` ճանաչելու Հայոց ցեղասպանությունը: Որպես Հոլոքոստ վերապրածների հոտնորդներ, ովքեր պայքարում են դրա ժխտման դեմ, մենք պետք է մեր կարեկցանքը ցուցաբերենք մյուս ժողովուրդների տառապանքների հանդեպ»: Մենք հույս ունենք մինչև 2015 թվականի ա պրիլը ունենալ մոտ կես միլիոն ստորագրություն»,-ավելացրեց ՀՀ նախագահի մրցականակիրը:

Նա նաև հայտնեց, որ 2015-ին Իսրայելի Բաց համալսարանում իրենք կազմակերպելու են միջազգային գիտաժողով, որն առաջին անգամ տեղի կունենա Իսրայելում` հիշատակելով Հայոց ցեղասպանության 100-րդ տարելիցը:

«Ես պայքարում եմ իմ կառավարության դեմ ոչ միայն ձեզ համար. ես դա անում եմ ինձ համար: Թույլ տվեք ասել, որ իմ բարոյական արժեքներից ելնելով, ես անտարբեր չէի կարող լինեն: Ես ձեզ հավաստիացնում եմ, որ ես և, համոզված եմ նաև բազմաթիվ հրեաներ Իսրայելում և ամբողջ աշխարհում, կշարունակենք մեր պայքարը Իսրայելի ու ամբողջ աշխարհի կողմից Հայոց ցեղասպանության ճանաչման համար: Սա իմ պարտավորությունն է որպես մարդ արարած, որպես հրեա և իսրայելցի»,-եզրափակեց Յահիր Աուրոնը:

Մայիսի 26-ին կայացավ ՀՀ նախագահի 2013 թվանակի մրցանակների հանձնման արարողությունը ՀՀ նախագահի նստավայրում: Մրցանակին արժանացան կրթության, գիտության և մշակույթի մի շարք անհատներ իրենց ունեցած նշանակալի ներդրման համար: