Չստացված տեքստով

Մայիսի 24-ին տեղի ունեցավ ՀՀԿ 15-րդ հերթական համագումարը, որի ընթացքում Սերժ Սարգսյանը վերընտրվեց ՀՀԿ ղեկավարի պաշտոնում:

Համագումարի ընթացքում Սերժ Սարգսյանը ելույթ ունենալով` խոսեց նաև ընդդիմության մասին, նշելով, որ իշխանությունն ու ընդդիմությունը իրար թշնամի չեն:

«Իշխող կուսակցությունն ու ընդդիմությունը, որքան էլ իրար քննադատեն, իմ համոզմամբ, թշնամիներ չեն, նույնիսկ եթե մեր որոշ քաղաքացիների մոտ բուռն քաղաքական բանավեճերի լայն լուսաբանումից նման տպավորություն ձևավորվի: Մենք կիսելու հայրենիք չունենք. մենք պետք է իրար փոխլրացնենք, որպեսզի պաշտպանենք ու ծաղկեցնենք մեր հայրենիքը:

Իշխող քաղաքական ուժը և ընդդիմությունը պետության համար նույնն են, ինչ մարդու երկու ձեռքերը. անհրաժեշտ է և′ աջը, և′ ձախը: Երկուսն էլ ունեն իրենց հստակ գործառույթները: Նրանցից մեկի խեղումից մյուսն ավելի ուժեղ չի դառնում. պարզապես մարդը դառնում է անդամալույծ»,- իր ելույթում, մասնավորապես, նշել էր Սերժ Սարգսյանը:

Հնչեցրած տեսակետների վերաբերյալ Լուրեր.com-ը զրուցեց «Ժառանգություն» կուսակցության փոխնախագահ Արմեն Մարտիրոսյանի հետ: 

«Այդ դեպքում ինչո՞ւ են անընդհատ իշխանությունը պահելու համար կեղծում ընտրությունները, ընդդիմությանը թույլ չեն տալիս ֆինանսական աղբյուրներ ունենալ, պետական ֆինանսավորում չեն տալիս կուսակցություններին, որը շատ անհրաժեշտ է նաև ընդդիմությանը, ինչո՞ւ են դպրոցները, բուհերը հանրապետականացնում»,- ասաց Մարտիրոսյանը:

Վերջինս անդրադարձավ նաև Սարգսյանի ելույթի սկզբին. «Ելույթի սկզբում ասվում է, որ Տավուշի մարզի Գոշ գյուղի բնակիչը պետք է դիմի Հանրապետական կուսակցության ներկայացուցչին: Դա, կարծում եմ` արդեն կոչվում է իշխանության ուզումպացիա մի կուսակցության կողմից: Մենք նմանատիպ իրավիճակ տեսել ենք Խորհրդային միությունում. դա կոչվում է կուսակցապետություն, այն էլ միակուսակցապետություն, որը, կարծում եմ` բացառապես տեղին չէր: Չգիտեմ` տեքստն ով էր գրել, բայց լավ տեքստ չէր գրել, հատկապես ելույթի սկզբի հատվածը, որովհետև քաղաքացին իր փլուզված տան հետ կապված ոչ թե պետք է կուսակցության դիմի, այլ տեղական ինքնակառավարման կամ պետական կառավարման մարմիններին»,- ասաց «Ժառանգություն» կուսակցության փոխնախագահը: