Ուկրաինացի քաղաքագետը հույս ունի, որ Ուկրաինան կմասնակցի ԱՊՀ կառավարությունների ղեկավարների խորհրդի նիստին

Բելառուսի մայրաքաղաք Մինսկում մայիսի 30-ին կանցկացվի ԱՊՀ կառավարությունների ղեկավարների խորհրդի նիստը: Սպասվում է, որ այդ նիստին կքննարկվեն համագործակցության տարբեր ուղղություններին նվիրված փաստաթղթերի ավելի քան 20 նախագծեր' սկսած տնտեսական դաշինքից մինչև հումանիտար ոլորտի համագործակցություն: Խորհրդի նիստին ընդառաջ' մայիսի 27-ին անցկացվեց «ԱՊՀ գագաթնաժողով. Համագործակցության արդիական օրակարգը» թեմայով Երևան-Մոսկվա-Աստանա-Կիև-Քիշնև տեսակամուրջ: Տեսակամուրջի ընթացքում քննարկվեց նաև Ուկրաինայում նախօրեին հնչած հայտարարությունն այն մասին, որ երկիրը, հնարավոր է, դուրս գա ԱՊՀ կազմից:

Ուկրաինացի քաղաքագետ, ԱՊՀ երկրների ինստիտուտի ուկրաինական մասնաճյուղի տնօրեն Դենիս Դենիսովը հիմարություն է որակում այս քայլը:

«Անհիմն հայտարարություն է, որի շրջանակում հնչեց երկու թեզ: Նախ, որ Ուկրաինան կդադարեցնի անդամակցությունն ԱՊՀ-ին և նաև այն, որ անհրաժեշտ է վիզային գործընթաց սկսել Ռուսաստանի հետ: Միանշանակ է, որ ԱՊՀ-ից Ուկրաինայի դուրս գալը կնշանակի նաև ազատ առևտրի դադարեցում: Սա ավելի վատ է, եթե որևէ մեկի մոտ ԱՊՀ-ից դուրս գալու ցանկություն լինի, ապա բոլոր մասնագիտությունների տեր մարդկանց համար խնդիրների կլինեն' գիտելիքների փոխանակման և այլ առումներով»,- նշեց Դենիսովը:

Ուկրաինացի քաղաքագետը հույս ունի, որ Ուկրաինան կմասնակցի ԱՊՀ կառավարությունների ղեկավարների խորհրդի նիստին: «Ուկրաինան բազմաթիվ համաձայնագրեր ունի, հույս ունեմ, որ Ուկրաինան կմասնակցի Մինսկի գագաթնաժողովին»,- ընդգծեց Դենիսովը: Երկրում այժմ սպասում են նորընտիր նախագահի որոշմանը:

Ռուսաստանի գիտությունների ակադեմիայի Եվրոպայի ինստիտուտի ԱՊՀ երկրների ռազմավարական զարգացման կենտրոնի ղեկավար, պրոֆեսոր Ալեքսանդր Գուսևն ընդգծեց, որ կառավարությունների ղեկավարների խորհրդի նիստը պլանավորած էր դեռ նախորդ տարի: «Կքննարկվի 23 համաձայնագիր' քաղաքական, տնտեսսական և այլ հարցերի վերաբերյալ, երկրների միջև առևտրային մեծ շրջանառության մասին, ինչպես նաև մեծ փաթեթ է առկա անվտանգության վերաբերյալ: Անհրաժեշտ է պետությունների ղեկավարների ներկայությունը: Մեզ համար ուկրաինական պատվիրակության առկայությունը ևս կարևոր է, սակայն կարծում եմ, որ նրանք գուցե չգան»,- ընդգծեց Ալեքսանդր Գուսևը: Գուսևի համոզմամբ, եթե Ուկրաինան դուրս գա ԱՊՀ-ից, ապա անհիմն որոշում կկայացնի, որը ոչնչի չի հանգեցնի: Բանախոսն ընդգծեց, որ ՌԴ նախագահը բազմիցս նշել է Ուկրաինայի դերի կարևորությունը: