Մենք պարտավոր ենք աչքի լույսի պես պահել և պաշտպանել 23-ամյա մեր պետության անկախությունը. «Ժառանգություն»

96 տարի առաջ Հայ ազգային խորհրդի կողմից հռչակվեց Հայաստանի առաջին հանրապետությունը` վերականգնելով դարեր առաջ կորսված Հայաստանի անկախ պետականությունը: Հայաստանի Հանրապետությունը ստեղծվեց Սարդարապատի, Բաշ Ապարանի և Ղարաքիլիսայի ճակատամարտերում հայ ժողովրդի հերոսական մաքառման և փառահեղ հաղթանակի շնորհիվ: Այսօր մենք մեր հարգանքի տուրքն ենք մատուցում 20-րդ դարասկզբի մեր հերոսների, առաջնորդների, ողջ ժողովրդի սխրանքին, առանց որի չէր լինի ո′չ դրան հետևած Հայաստանի խորհրդային հանրապետությունը և ո′չ էլ մերօրյա Հայաստանի Հանրապետությունը:

Ցավոք, Առաջին հանրապետությունը կործանվեց թուրք-բոլշևիկյան հակահայ դաշինքի գործողությունների, 11-րդ կարմիր բանակի հարձակման արդյունքում: Եվ այսօր մենք պարտավոր ենք դասեր քաղել մեր պատմությունից և թույլ չտալ դրա դառը էջերի կրկնությունը: Մենք պարտավոր ենք աչքի լույսի պես պահել և պաշտպանել 23-ամյա մեր պետության անկախությունն ու ինքնիշխանությունը ցանկացած` արտաքին թե ներքին սպառնալիքից և ոտնձգությունից:

«Ժառանգությունը» նաև իր զորակցությունն է հայտնում իրենց պետության ինքնիշխանության համար պայքար մղող բոլոր ժողովուրդներին և օգտվելով առիթից շնորհավորում ենք Ուկրաինայի ժողովրդին` երկրի ղեկավար ընտրելու կապակցությամբ և մաղթում նրան խաղաղություն, ազատություն, իսկ նորընտիր նախագահ Պետրո Պորոշենկոյին` հաշվետու ծառայություն: Մենք նաև շնորհավորում ենք Եվրամիության մեր գործընկերներին՝ Եվրախորհրդարանի ընտրությունների կապակցությամբ և հատկապես ԵԺԿ-ի ներքո համախմբված մեր քույր կուսակցություններին՝ ընտրություններում արձանագրած հաղթանակի կապակցությամբ:

«Ժառանգություն» կուսակցություն

28 մայիսի, 2014թ.