Ադրբեջանի սպառազինության հարցը մտահոգում է նաև միջազգային հանրությանը. Էդվարդ Նալբանդյան

Ադրբեջանի սպառազինության հարցը մտահոգում է նաև միջազգային հանրությանն ու ԵԱՀԿ Մինսկի խմբի եռանախագահող երկրներին: Այս մասին հայտարարեց ՀՀ արտաքին գործերի նախարար Էդվարդ Նալբանդյանը Սարդարապատում` լրագրողների հետ զրույցում: «Այս խնդրով մտահոգված են նաև միջազգային հանրությունը և եռանախագահող երկրները, որոնք կոչ են անում համապատասխան քայլեր ձեռնարկել հրադադարի ամրապնդման, դիպուկահարներին շփման գծից դուրս բերելու ուղղությամբ»,- ասաց նախարարը:

Անդրադառնալով ԵԱՀԿ Մինսկի խմբի համանախագահների վերջին հայտարարություններին` նախարարն ասաց, որ բանակցային գործընթացն իր հունով ընթանում է: «Մի քանի օրից համանախագահները կլինեն Ադրբեջանում, որովհետև վերջին անգամ, երբ տարածաշրջանում էին և այցելեցին Հայաստան ու Լեռնային Ղարաբաղ, Ադրբեջանի ղեկավարությունը երկրում չէր»,- հիշեցրեց Նալբանդյանը: Ինչ վերաբերում է համանախագահների հայտարարություններին՝ Լեռնային Ղարաբաղի հարակից ազատագրված տարածքները հանձնելու մասին, նախարարը հորդորեց նայել այն առաջարկները, որոնք արվել են եռանախագահող երկրների նախագահների կողմից:

Օրեր առաջ հրապարակվեց, որ մոտ ժամանակներս Ռուսաստանն Ադրբեջան կմատակարարի վերջինիս կողմից պատվիրված TOS-1A հրանետների հերթական խմբաքանակը: Հրանետների հերթական խմբաքանակը կազմված կլինի 6 մեքենայից: Ինչ վերաբերում է համանախագահների տարածաշրջան այցին, նրանք մայիսի 19-ին մեկնել են Բաքու՝ ԵԱՀԿ մշտադիտարկման ընթացքում հատելով շփման գիծը, սակայն պարզվել է, որ այդ երկրի նախագահ Ալիևն ու ԱԳ նախարար Մամեդյարովը Վիետնամում են: