«Ժողովուրդ». Զարմանալի էր Արա Ավետիսյանի այդօրինակ պահվածքը

Դեռեւս 2013թ. հունիսի 25-ին, Պոլիտեխնիկում ապօրինաբար պետական գույք օտարելու դեպք էր բացահայտվել: ՀՔԾ մամուլի ծառայությունից հայտնել էին, որ նախագահի վերահսկողական ծառայությունից ստացված հաղորդման հիման վրա ՀՔԾ-ում նախապատրաստված նյութերով պարզվել է, որ պետական ճարտարագիտական համալսարան (Պոլիտեխնիկ) պետական ոչ առեւտրային կազմակերպության պաշտոնատար անձինք, օգտվելով ՀՀ պետական կառավարման մարմինների առանձին պաշտոնատար անձանց կողմից ծառայության նկատմամբ անփույթ վերաբերմունքի հետեւանքով իրենց պարտականությունները ոչ պատշաճ կատարելու հանգամանքից, վատնել են ՀՀ Կառավարության 2010թ. մայիսի 13-ի թիվ 654-Ն որոշմամբ անհատույց օգտագործման իրավունքով պետական ոչ առեւտրային կազմակերպությանն ամրացված, պետական սեփականություն հանդիսացող առանձնապես խոշոր չափերի' 18.286.607 ՀՀ դրամ արժողությամբ թանկարժեք մետաղներից պատրաստված իրերը' 2012թ. մարտի 28-ին «Երեւանի Ադամանդ» ապրանքա-հումքային բորսա» ՓԲ ընկերության միջոցով 2.251.605 ՀՀ դրամով ապօրինի օտարել' վաճառել են այլ անձի:

Արդյունքում ՀՔԾ-ում հարուցվել էր քրեական գործ' ՀՀ քրեական օրենսգրքի 179-րդ հոդվածի 3-րդ մասի 1-ին կետով եւ 315-րդ հոդվածի 2-րդ մասով:

Եվ ահա շուրջ մեկ տարի անց ընթացող քննությունը վերջերս կասեցվել է: «Ժողովուրդ»-ը հատուկ քննչական ծառայության հասարակայնության հետ կապերի եւ լրատվության վարչությունից տեղեկացավ, որ «Հայաստանի պետական ճարտարագիտական համալսարան» (Պոլիտեխնիկ) պետական ոչ առեւտրային կազմակերպությունում ենթադրաբար կատարված յուրացման եւ անփութության հատկանիշներով հարուցված քրեական գործով անհրաժեշտ փորձաքննություն կատարելու նպատակով ՀՔԾ-ն գրավոր դիմել է օտարերկրյա մի շարք կազմակերպությունների' ՀՀ բացակայող փորձագիտական ուսումնասիրման մեթոդների, սարքերի տրամադրման հարցում աջակցության ակնկալիքով:

Ուստի մինչ վերը նշված միջնորդությունների պատասխանները ստանալը հարուցված քրեկան գործի վարույթը կասեցվել է ՀՀ քրեական դատավարության օրենսգրքի 31-րդ հոդվածի 1-ին մասի 1-ին կետի հիմքով:

Հ. Գ. Ամեն դեպքում զարմանալի էր Արա Ավետիսյանի այդօրինակ պահվածքը: Վերջինս իրեն արդարացնելու կամ պետական մարմինների գործողությունները պարզաբանելու փոխարեն լավագույն տարբերակը համարեց լրագրողին սպառնալ' հոխորտալով. «Շուշանի նման ասեմ»: Արա Ավետիսյանը հավանաբար մոռացել է, որ Շուշանը կին է եւ այն, ինչ կարելի է կնոջը, չի կարելի տղամարդուն: Եվ եթե այդքան սպառնացող է նախկին ռեկտորը, թող սպառնա այն պետական մարմիններին, ովքեր հարուցել են այդ գործերը, եւ ոչ թե լրագրողին, ով իրեն հարց է ուղղում պետական մարմինների կատարած գործողությունների մասին:

Շարունակությունը` «Ժողովուրդ» օրաթերթի այսօրվա համարում: