Արարատի մարզի երկրապահները եղան Սարդարապատի հուշահամալիրում

Արարատի մարզի երեք տարածաշրջանների 200 երկրապահներ ԵԿՄ տարածաշրջանային նախագահների գլխավորությամբ երեկ այցելեցին Սարդարապատի հերոսամարտի հուշահամալիր: Պատվիրակության մեջ էին նաև մարզի պատանի և փոքրիկ երկրապահները, Ջրաշենի համայնքի դպրոցականները' զինղեկ Արտակ Խաչատրյանի ղեկավարությամբ: Այնտեղ էին նաև պատանի երկրապահներ և ԵԿՄ ներկայացուցիչներ' տարբեր մարզերից, ԱԺ պատգամավորներ, ՀՀ կառավարության անդամներ, ԵԿՄ վարչության նախագահ գեներալ-լեյտենանտ Մանվել Գրիգորյանը, գեներալ Սամվել Սարոյանը, այլք: Հնչեց «Սարդարապատ» երգը, որի հնչյունների ներքո ներկաները, ԵԿՄ անդամները խոնարհվեցին` ծաղիկեպսակներ դնելով: Ապա պատանի երկրապահները, հանրապետության և արտերկրից ժամանած պատանի սկաուտները, «Նավասարդ» ակումբի անդամները երգեցին երկրապահի քայլերգը, գուսան Հայկազունի և այլ ռազմահայրենասիրական երգեր: Երկրապահները բռնեցին նաև շուրջպար: Այդ կերպ օտարազգի պատանի սկաուտները երգեցին նաև Գարեգին Նժդեհին, Անդրանիկ Օզանյանին և Դրաստամատ Կանայանին նվիրված երգեր:

ԵԿՄ վարչության նախագահ գեներալ-լեյտենանտ Մանվել Գրիգորյանը շնորհավորեց ներկաներին` ընդգծելով, որ Սարդարապատի հերոսամարտը դրեց ոչ միայն առաջին հանրապետության հիմքը, այլ նաև բախտորոշ եղավ հայ ժողովրդի համար այն առումով, որ Թուրքիայում օսմանների կողմից չշարունակվեց հայոց ցեղասպանությունը: