Հայկական զինված ուժերը պատրաստ են ապահովելու հայրենիքի անվտանգությունը. Սեյրան Օհանյան

Սահմանին լարվածությունը շարունակում է պահպանվել, կրակոցների քանակն ավելացել է շփման գծում, սակայն իրավիճակը վերահսկելի է: ՀՀ պաշտպանության նախարար Սեյրան Օհանյանի փոխանցմամբ, իրավիճակը սահմանին միշտ էլ եղել է վերահսկելի և հայկական զինված ուժերն են իրավիճակի թելադրողները: «Այն, որ հակառակորդը դիվերսիոն հետախուզություն է կատարում և ստանում արժանի պատասխան, այն, որ պատերազմ անցած հրամանատարները, ռազմական կրթություն ստացած սպաներն ու առաջին գծում զինվորները փոխադարձ համագործակցության և աջակցության շնորհիվ կարողանում են հետ մղել հակառակորդի մի քանի անգամ ավելի շատ խմբերը, դա նշանակում է, որ հայկական զինված ուժերը պատրաստ են ցանկացած իրավիճակի»,- լրագրողների հետ ճեպազրույցի ժամանակ ասաց Օհանյանը' հավելելով, որ իրավիճակն այնպիսին է, որ գրանցվում են նաև ցավալի դեպքեր:

«Սա եղել է արցախյան գոյապայքարի ժամանակ, երբ մեր ընկերներից շատերը զոհվեցին և վիրավորվեցին և որոշակի չափով շարունակվում է նաև այսօր: Սակայն հավաստիացնում եմ ձեզ, որ հայկական զինված ուժերը պատրաստ են ապահովելու հայրենիքի անվտանգությունը»,- ասաց նախարարը:

Խոսելով խաղաղության մասին և ցանկանելով երկարատև խաղաղություն, ըստ Օհանյանի, պետք է ունենալ նաև այդ ցանկությունները կիսող հարևան, ով պետք է կառուցողական մոտեցում ցուցաբերի բանակցային գործընթացի ընթացքում և հարաբերություններում: «Այդ ամենը չենք տեսնում, և դա է պատճառը, որ տեղի է ունենում հրադադարի խախտում և այսօրվա ժամանակավոր իրավիճակը ստանում է «ոչ պատերազմ ոչ խաղաղություն անունը»»,- ասաց Սեյրան Օհանյանը' հավելելով, որ հրադադարի պայմանագրի կատարումը կարողանում են պահպանել ՀՀ զինված ուժերը առաջին հերթին ռազմահայրենասիրական դաստիարակության համապատասխան մակարդակի շնորհիվ:

«Երկարատև խաղաղության մասին մտածում է նաև մեր ժողովուրդը և խոսելով ուժի մասին, որը պետք է զսպման մեխանիզմ հանդիսանա, չպետք է դիտարկենք միայն զինվորին, սպառազինությունն ու բիրտ ուժի կիրառումը: Ուժը նաև ժողովրդի համախմբված լինելն է, միասնությունը, կրթական մակարդակի բարձրացումը»,- ասաց Սեյրան Օհանյանը' հավելելով, որ տարին նախարարությունը հռչակել է արատավոր բարքերի դեմ պայքարի, և դրական ու վսեմ հատկանիշները մանուկների և զինվորների մոտ պետք է ավելի բարձր հիմքերի վրա լինեն: