Հայրենիքի ապագան հուսալի ձեռքերում է. Սեյրան Օհանյան

Հայաստանում ԼՂՀ ներկայացուցչությունում ամփոփվեց ԼՂ զինադադարի 20-ամյակին նվիրված «Ուզում ես խաղաղություն, պատրաստվիր պատերազմի» թեմայով շարադրությունների հանրապետական մրցույթը: ՀՀ կրթության և գիտության նախարար Արմեն Աշոտյանի գնահատմամբ, մրցույթի անցկացումը զանգվածային բնույթ է ստացել, և մասնակցությունը մի քանի անգամ գերազանցել է հանրապետական նախորդ մրցույթներին մասնակցությունների թիվը: Նախարարի գնահատմամբ` դժվար է եղել ընտրություն կատարել, քանի որ որակը եղել է բարձր, հայրենասիրական տրամադրվածությունը` նույնպես: Հայրենասիրական դաստիարակության սերմանումը շատ կարևոր է և այսօր: Ամփոփելով շարադրությունների մրցույթը` փաստում ենք, որ աշակերտները սիրում են իրենց հայրենիքը, պատմությունը, հետաքրքրված են Արցախով և միայն ուշիմ, նպատակասլաց և հայրենասեր լինելով խաղաղությունը հնարավոր կլինի դարձնել երկարատև, իսկ երկիրը` ուժեղ»,- շարադրությունների մրցույթի ամփոփման և մրցանակաբաշխության ժամանակ ասաց Արմեն Աշոտյանը:

ՀՀ պաշտպանության նախարար Սեյրան Օհանյանի գնահատմամբ` թեման խորհրդանշական է և անցկացվում է խորհրդանշական ժամանակահատվածում. մայիսը հաղթանակների ամիս է, և հենց այդ ամսին է ստորագրվել նաև հրադադարը: «Հիմքում ընկած է պատրաստականությունը, որը հաղթանակների կերտման և հաղթանակի ապահովման առաջին պայմանն է: Ուժ ասելով, մենք հասկանում ենք ոչ միայն ՀՀ բանակը, որը կանգնած է անվտանգության ապահովման գոտում, այլև ուժային մնացած կառույցները, որոնց միասնական աշխատանքի շնորհիվ ձևավորվել է անվտանգության համակարգը: Այսօրվա շարադրությամբ գալիս ենք եզրակացության, որ ուժ ասելով չհասկանանք միայն զինվոր, սպառազինություն, այլև ուժ ասելով հասկանանք պետության մնացած ոլորտները` տնտեսությունից մինչև կրթություն»,- ասաց Սեյրան Օհանյանը` հավելելով, որ այդ ոլորտում համագործակցությունը սերտ է, և Կրթության և գիտության նախարարության հետ երկարատև պայմանագիր են կնքել` նպատակ հետապնդելով գիտելիքահեն քաղաքականություն իրականացնել նաև պաշտպանական համակարգում:

Նախարարը խոստովանում է, որ ընթերցել է որոշ շարադրություններ, հասկացել մանուկների հուզական աշխարհը և համոզվել, հայրենիքի ապագան հուսալի ձեռքերում է: