Տավուշի մարզում մարդիկ չեն պաշտպանում իրենց իրավունքները

Անցած տարվա տվյալներով, մարդու իրավունքների խախտման դեպքերի առումով ամենատխուր իրավիճակը Տավուշի մարզում է եղել: Այս մասին Ազգային ժողովում լրագրողների հետ զրույցում ասաց ՀՀ մարդու իրավունքների պաշտպան Կարեն Անդրեասյանը: «Տավուշի մարզում ոչ միայն կան այն խնդիրները, որոնք կան բոլոր մարզերում, այլև այստեղ մենք նույնիսկ գրասենյակ ունենք, սակայն որոշակ ի պասիվություն է նկատվում և մեթոդների տարբերություն»,- ասաց Անդրեասյանը:

Նա ընդգծեց, որ եթե օրինակ Լոռու մարզում մարդիկ ակտիվ են, իրենց իրավունքները պաշտպանում են և պետական մարմինների հետ որոշակի աշխատանք են տանում, ապա Տավուշի մարզում խնդիրները չբարձրացված են մնում: «Այստեղ շատ դեպքերում մարդիկ նույնիսկ ոտքի էլ չեն կանգնում իրենց իրավունքները պաշտպանելու համար»,- նշեց Անդրեասյանը:

Սյունիքի մարզում ևս սուր հարցեր կան, սակայն այս մարզում նույնպես բնակչությունը ակտիվ է մարդու իրավունքների պաշտպանության առումով: «Սյունիքի մարզում էլ մենք ունենք գրասենյակ և ծանոթ ենք բոլոր խնդիրներին: Սյունիքի մարզն ավելի ակտիվ է, քան Տավուշի մարզը: Եթե նայենք ցուցանիշները, միշտ չէ, որ մարդու իրավունքները տվյալ մարզում խնդրահարույց են, եթե այնտեղից բողոք կա: Խնդրահարույց է, երբ կա խնդիր, սակայն բողոք չկա»,- ասաց Անդրեասյանը՝ ընդգծելով, որ այդ դեպքում ինչ-որ բան փոխվելու հնարավորությունները շատ ավելի քիչ և թույլ են:

Նա ընդգծեց, որ մարզերի վիճակագրությունը նայելիս՝ ինքը միշտ առաջնորդվում է մարդկանց գիտակցության աստիճանով, նրանց ակտիվության մակարդակով, անվախության մակարդակով: Այս իմաստով Անդրեասյանը չի համարում, որ Լոռու մարզը, որտեղից ամենաշատն են բողոքներ լինում, ամենավատ մարզն է եղել, կամ այնտեղ ամենաշատն են մարդու իրավունքները խախտվում: Մարդու իրավունքների պաշտպանն ընդգծեց, որ Լոռու մարզում մարդիկ գերինտելեկտուալ աշխատանք են տանում իրենց իրավունքները պաշտպանելու համար: