Պուտինի վարկանիշը մայիսին աճել է մինչև 83 տոկոս

ՌԴ-ի նախագահի պաշտոնում Վլադիմիր Պուտինի գործունեությանը մայիսին հավանություն է տալիս ռուսաստանցիների 83 տոկոսը: Այդ մասին մայիսի 29-ին «Ինտերֆաքս»-ին հայտնել են «Լևադա կենտրոնի» սոցիոլոգները:

Նրանց տվյալներով՝ մարտի սկզբին պետության ղեկավարի գործունեության հավանության վարկանիշը 72 տոկոս էր, իսկ հունվարին՝ 65 տոկոս:

Ընթացիկ տարվա հինգ ամսվա ընթացքում ռուսաստանցիների շրջանում նախագահի աշխատանքից դժգոհողների թվաքանակը կրճատվել է կրկնակի (34 տոկոսից մինչև 16 տոկոս), ինչը ցույց է տվել մայիսի 23-26-ին սոցիոլոգների կողմից կատարված հարցումը, որին մասնակցել են Ռուսաստանի 45 տարածաշրջանների 130 բնակավայրերի 18-ից բարձր տարիքի 1600 մարդ: Վիճակագրական սխալանքը չի գերազանցում 3,4 տոկոսը:

«Լևադա կենտրոնի» տեղեկությունների համաձայն՝ Ռուսաստանի կառավարության նախագահ Դմիտրի Մեդվեդևի գործունեությանը մայիսին հավանություն է տալիս հարցման մասնակիցների 65 տոկոսը (հունվարին՝ 48 տոկոս, ապրիլին՝ 60 տոկոս), հավանություն չի տալիս 34 տոկոսը (51 տոկոս, 38 տոկոս):

Այն, որ ընդհանուր առմամբ երկրի գործերը ճիշտ ուղղությամբ են ընթանում, այսօր հայտարարում է հարցվածների 60 տոկոսն այն դեպքում, երբ հունվարին այդ ցուցանիշը 43 տոկոս էր: Ներկայում հակառակ կարծիքն է պաշտպանում հարցախույզի մասնակիցների 23 տոկոսը (հունվարին՝ 41 տոկոս):