Հայաստանը պատրաստ է առաջ մղել ԵՄ հետ փոխգործակցությունը. ԱԳ փոխնախարար

Եվրամիությունը եղել և շարունակում է մնալ Հայաստանի կարևոր գործընկերից մեկը: Այս մասին Ազգային ժողովում ՀՀ 2013թ. պետական բյուջեի քննարկման ժամանակ նշեց ՀՀ ԱԳ նորանշանակ փոխնախարար Կարեն Նազարյանը: «2013թ. ընթացքում շարունակվել են Հայաստանի և Եվրամիության միջև քաղաքական շփումները և բարձրաստիճան պաշտոնյաների փոխայցելությունները»,- ասաց Նազարյանը:

Փոխնախարարը հիշեցրեց, որ 2013թ. նոյեմբերի 28-29-ին ՀՀ Նախագահը մասնակցել է Վիլնյուսում տեղի ունեցած Արևելյան գործընկերության գագաթնաժողովին, որտեղ ընդունվել է համատեղ հռչակագիր, որով Արևլյան գործընկերության կողմից նախանշվում են մի շարք նպատակներ, որոնց իրագործումը ավարտին պետք է հասնի մինչև 2015թ.: «Հենց այդ նպատակների հիման վրա կձևավորվեն Հայաստան-Եվրամիություն ապագա փոխհարաբերությունները: Գագաթնաժողովի ժամանակ ընդունված Հայաստան-Եվրամիություն համատեղ հայտարարությամբ վերահաստատվել է Հայաստանի հանձնառությունը առավել զարգացնել և ամրապնդել փոխադարձ հետաքրքրող ոլորտներում համապարփակ համագործակցությունը: Ինչպես արձանագրվում է այդ հայտարարությունում, Հայաստանը և Եվրոպական Միությունը համաձայնել են հարաբերությունները կարգավորող իրավական նոր հիմքերի ստեղծման անհրաժեշտության, ինչպես նաև Եվրոպական հարևանության քաղաքականության գործողությունների նորացման շուրջ»,- ասաց նա:

Նազարյանը նշեց, որ առաջիկայում աշխատանքներ են տարվելու Հայաստան-Եվրամիություն համագործակցության նոր շրջանակի ձևավորման ուղղությամբ: Նրա խոսքով' Հայաստանը պատրաստ է առաջ մղել Եվրոպական միության հետ փոխգործակցությունը բարեփոխումների խթանման, շարժունակության, արդյունավետ կառավարման, ժողովրդավարության, մարդու իրավունքների և ամենատարբեր այլ բնագավառներում: «ԵՄ-ի հետ ոլորտային համագործակցությունն ընդլայնելու նպատակով 2013թ. Հայաստանի Ազգային ժողովի ու Եվրոպական խորհրդարանի կողմից վավերացվել է և սույն թվականի մարտից ուժի մեջ է մտ ել ԵՄ ծրագրերին Հայաստանի մասնակցության ընդհանուր սկզբունքների վերաբերյալ արձանագրությունը, որը Հայաստանին հնարավորություն է տալիս մասնակցել ԵՄ տարբեր ծրագրերի' կրթական, առողջապահական, մշակութային և մի շարք այլ ոլորտներում»,- պարզաբանեց փոխնախարարը:

Կարեն Նազարյանը հիշեցրեց նաև, որ 2013թ. նոյեմբերին ստորագրվել և սույն թվականի հունվարին վավերացվել է Հայաստանի և ԵՄ միջև վիզաների դյուրացման համաձայնագիրը: