«Հրապարակ». Անգամ Ղազախստան-Բելառուս երկյակի կողքին մեզ չեն տեսնում

Չգիտես՝ ուրախանաս, որ Աստանայում մեր երկրի նախագահը ոչինչ չստորագրեց, թե՞ տխրես, որ այնքան լիարժեք պետություն չենք, որ անգամ Ղազախստան-Բելառուս երկյակի կողքին մեզ չեն տեսնում: Մինչ ամիսներ շարունակ մեզ ներշնչում էին, թե ավելի լավ է Մաքսայինում առաջինը լինել, քան Եվրոպայում վերջինը, պարզվեց՝ Մաքսայինում էլ ենք վերջինը: Համահիմնադիրի կարգավիճակ չունեցանք, բայց հասցրել ենք մեր օրենքները մեծ փութաջանությամբ՝ հիմնադիրներից առաջ, համապատասխանեցնել Մաքսային ու Եվրասիական միության պահանջներին. անհրաժեշտ 126 փաստաթղթից 119-ն էլ արդեն ընդունել ենք: Եվ խնդրում ենք թույլատրել մեզ, որ Եվրասիական միությանը միանալու պայմանագիրը ստորագրենք ոչ ուշ, քան հունիսին:

Եվ մեզ, որպես «գերազանցիկ» աշակերտի, ԵՏՄ հիմնադիր երկրների նախագահները գովում են ու քաջալերում: Բայց, որպեսզի շատ երես չառնենք «գովեստից», չեն զլանում ձեռքի հետ էլ «ապտակ» հասցնել. Ղազախստանի՝ մեր հանդեպ առանձնապես սեր չտածող նախագահը Սերժ Սարգսյանի համար անսպասելի հայտարարեց, որ Ալիեւից նամակ են ստացել եւ չեն ուզենա նրան նեղացնել, ուստի՝ Հայաստանը պետք է անդամագրվի ՄԱԿ-ի ճանաչած սահմանների շրջանակներում, այնպես, ինչպես 2003 թվականին անդամագրվել է Առեւտրի համաշխարհային կազմակերպությանը: Հարց է ծագում՝ իսկ ինչո՞ւ են հիշել 2003 թվականի մի փաստաթուղթ, որը մեր՝ Մաքսային մտնելով, դառնալու է որեւէ ուժ չունեցող թղթի կտոր: Եվ ինչո՞ւ են հաշվի առնում մի երկրի նախագահի նամակ, ով ոչ Մաքսայինի, ոչ ԵՏՄ-ի անդամ չէ: Նույն հաջողությամբ ՀՀ նախագահն էլ կարող է հաջորդ անգամ Խորհրդի նիստին ներկայացնել Պորոշենկոյի նամակը, որտեղ նա խնդրում է Ռուսաստանին ԵՏՄ ընդունել մինչեւ 2013 թվականն ունեցած սահմանների շրջանակներում՝ առանց Ղրիմի:

Շարունակությունը` «Հրապարակ» օրաթերթի այսօրվա համարում: