Եթե ընտրություններում հաղթի ընդդիմությունը, Սիրիան կդառնա նոր պատերազմների հարթակ. քաղաքագետ

Սիրիան այսօր հայտնվել է այն նույն իրավիճակում, ինչ Արցախը երկու տասնամյակ առաջ: Այն ժամանակ էլ Ալիևն էր ահաբեկիչներ վարձել, և երբ Հայաստանն այդ մասին բարձրաձայնում էր, աշխարհն ուշադրություն չէր դարձնում այդ հայտարարություններին: Այսօր էլ Սիրիայում են տարբեր երկրների վարձկաններ հավաքվել, և ստացվել է բազմաբևեռ մի պատերազմ, որը ո′չ քաղաքացիական է, ո′չ էլ հանուն գաղափարի: Քաղաքագետ Լևոն Մելիք-Շահնազարյանի փոխանցմամբ` Սիրիայի իշխանությունների դեմ պատերազմի համար վարձկանները ստանում էին հսկայական գումարներ: «Այժմ քաղաքների, տարածքների համար է գին նշանակվում: Քաղաքները' ղեկավարներին, թալանը' վարձկաններին»,- ասաց քաղաքագետը' հավելելով, որ վարձկանների մեջ մեծ թիվ են կազմում ադրբեջանցիների:

Եթե ընտրություններում Ասադը հաղթանակ չտանի, ապա Սիրիան կվերածվի նոր հզոր հրեշի, որը կդառնա պատերազմների հարթակ, որի կարգախոսը կլինի մարդասպանությունը, ու իշխանությունները կտարածեն իսլամիստական գաղափարներ: Այս առումով վտանգավոր է նաև այն փաստը, որ Սիրիայից հետո Լիբանանի անկումը կդառնա անխուսափելի:

Անդրադառնալով Սիրիայի հարցում թուրքական շահագրգռվածությանը` թուրքագետ Լևոն Հովսեփյանն ասաց, որ Թուրքիայի համար նպաստավոր պայմաններ էին ստեղծվել Սիրիան թուլացնելու համար, սակայն Թուրքիան ճիշտ հաշվարկ չէր կատարել և այդ պատճառով էլ խաղաքարտերը բացվեցին և Թուրքիան հայտնվեց շատ վատ իրավիճակում: Հովսեփյանի փոխանցմամբ` Թուրքիան Սաուդյան Արաբիային է վաճառել սպառազինություն ընդդեմ Սիրիայի, բացի այդ, կան հաստատված տեղեկություններ, որ Թուրքիան նաև քիմիական զենք է մատակարարել: