Մարզահամերգային համալիրի արտաքին տեսքը չի փոխվի

Երևանի Կարեն Դեմիրճյանի անվան մարզահամերգային համալիրի արտաքին տեսքը փոփոխության չի ենթարկվի, քանի որ նոր սեփականատերը դրա իրավունքը չի ունենա: Այս մասին Ազգային ժողովում ՀՀ 2013թ. կատարողականի քննարկման ժամանակ հայտարարեց ՀՀ մշակույթի փոխնախարար Արթուր Պողոսյանը՝ պատասխանելով ՀԱԿ խմբակցության պատգամավոր Արամ Մանուկյանի մտահոգությանը, թե աճուրդի պայմանագրում նշված չէ, որ մարզահամերգային համալիրը որպես մշակութային օբյեկտ է վաճառվում, և նոր սեփականատերը կարող է փոփոխությունների ենթարկել կառույցի արտաքին տեսքը: «Այստեղ արտաքին տեսքում փոփոխություն լինելու մասին խոսք չկա: Եթե խոսքը մասնավորեցման մասին է, մեր գործառույթի մեջ մտնում է մշակութային օջախ հանդիսացող շենքի հետ կապված պաշտպանական պարտավորագրերի ստորագրումը: Դա նշանակում է, որ սեփականատերը փոփոխություններ անելու իրավունք չունի, իսկ անելու դեպքում, նայած ինչ կարգի հուշարձան է՝ հանրապետական նշանակության, թե տեղական, պարտավոր է ստանալ որոշակի համաձայնություն»,- ասաց Պողոսյանը:

Նա նշեց, թե այս պահին որևէ տեղեկություն չունի, որ համալիրի տեսքը խեղումների է ենթարկվելու:

ՀԱԿ պատգամավորն էլ նշեց, որ պայմանագրի մեջ հենց մշակութային օբյեկտ բառն է բացակայում: «Ձեր ասածն ուժի մեջ է, եթե պայմանագրի մեջ նշվում է, որ վաճառվում է որպես մշակութային օբյեկտ, հենց այդ բառն է հանած, դրա համար եմ ես ուզում ձեր սկզբունքային, կարծր դիրքորոշումը, որ այդ տերմինը պայմանագրից չհանվի, դա նայեք, և եթե իմ ասածը ճիշտ է, դրա դեմ կռիվ տվեք»,-նշեց Մանուկյանը:

Պատասխանելով պատգամավորի դիտարկմանը' ՀՀ մշակույթի փոխնախարարը նշեց, որ ցանկացած մշակութային հուշարձանի կարգավիճակ որոշվում է ոչ թե դրա հետ կատարվող պայմանագրի ձևակերպմամբ, այլ այն փաստաթղթերով, որ հաստատել է կառավարությունը:

«Մենք ունենք պետական պատմամշակութային հուշարձանների ցանկ, որը կառավարությունը հաստատել է, և եթե այդ կառույցը համարվում է հուշարձան, այլ պայմանագիր չի գործում: Ես տեղյակ չեմ՝ կոնկրետ այդ պայմանագրի մեջ ինչ ձևակերպում է տրված, բայց որ դա հուշարձան է, ոչ մեկը չի կարող չընդունել»,- եզրափակեց Պողոսյանը: