Ջոն Հեֆֆերնը փորձում է ամերիկացի նորանոր ներդրողների ուշադրությունը հրավիրել Հայաստանի վրա

Հայաստանում ԱՄՆ դեսպան Ջոն Հեֆերնն այս օրերին Միացյալ Նահանգներների տարբեր քաղաքներում հանդիպումներ է անցկացնում հայկական համայնքների ներկայացուցիչների ու այն ընկերությունների հետ, որոնք կարող են ունենալ հետաքրքրություններ Հայաստանում ներդրումներ կատարելու հարցում, ընկերություններ, որոնց հետ, ըստ դեսպանի, կարելի է հաստատել գործընկերություն։ Ինչպես հայտնում է «Արմենպրես»-ը «Ամերիկայի Ձայնին» տված հարցազրույցում, Ջոն Հեֆերնը նշել է. «Մեր նպատակն է ավելի բարելավել ԱՄՆ-ի հարաբերությունները Հայաստանի հետ և այստեղ մեծացնել ազդեցությունը»։

Դեսպան Ջոն Հեֆերնի խոսքով` ԱՄՆ-ի արտգործնախարարը, USAID-ի ղեկավար Ռաջիվ Շահը աշխարհի տարբեր երկրներում ԱՄՆ-ի դեսպանություններին ու USAID-ի առաքելություններին հորդորում են կրկնապատկել բարեկամական երկրներում ԱՄՆ ազդեցությունը և ներկայությունը՝ աշխատելով տնտեսական կազմակերպությունների, մասնավոր հատվածի ընկերությունների և միջազգային կազմակերպությունների հետ։ «Մեր նպատակն է գտնել գործընկերներ, ովքեր փորձում են իրականացնել նույն աշխատանքը և ունեն նույն նպատակները, ինչպես, օրինակ, անցումային շրջանում գտնվող Հայաստանը, որն ուղի է որոնում 21-րդ դարում»,- ասել է նա:

Հարցին ի պատասխան, թե որ ճյուղերն են այսօր առավել կարևոր Հայաստանի համար, որոնց շուրջ կարելի է որոնել գործընկերներ ԱՄՆ-ում' դեսպանը նշել է, որ բոլոր ճյուղերն են կարևոր: «Իմ ուշադրությունը Երևանում անցած երկուսուկես տարիների պաշտոնավարման ընթացքում եղել է ԱՄՆ-ի ու Հայաստանի միջև տնտեսական հարաբերությունների խորացումը, առևտուրն ու ներդրումները։ Իմ տեսակետն այն է, որ Հայաստանի ու ԱՄՆ-ի միջև հարաբերություններն ավելի սերտացնելու համար Հայաստանն այսօր, իրոք, ունի տնտեսական նոր հնարավորությունների կարիք, հատկապես, Երևանից դուրս աշխատատեղեր ստեղծելու կարիք։ Եվ այսօր Հայաստանում ԱՄՆ-ի դեսպանության գլխավոր նպատակներից մեկն այս ոլորտներում նոր հնարավորությունների ստեղծումն է։ Հայաստանի կառավարության պաշտոնյաների, սփյուռքի ներկայացուցիչների հետ հանդիպումների ընթացքում հարցը լինում է հետևյալը. ինչպե՞ս պիտի կարողանանք ապահովել ամերիկյան ավելի մեծ ներդրումներ, ինչ պայմաններ պետք է լինեն ամերիկյան ավելի մեծաթիվ ընկերությունների կողմից ներդրումներ իրականացնելու համար, որոնք դառնան փոխշահավետ տնտեսական հարաբերություն ների հիմք»,- հայտնել է ԱՄՆ դեսպանը:

Անդրադառնալով պայմաններին, որոնք անհրաժեշտ են նման ներդրումների հոսքն ապահովելու համար' Ջոն Հեֆֆերնը պարզաբանել է. «Ամենաառաջին պայմանը բիզնես մթնոլորտի բարելավումն է, թափանցիկությունը, հակակոռուպցիոն պայքարը, կարգ ու կանոնը։ Հայաստանը շատ մոտ էր Եվրամիության հետ ինտեգրացման ծրագրին, և այսօր էլ Հայաստանում հույս ունեն շարունակել դա, ինչը չի հակասում, կրկնում եմ, չի հակասում Մաքսային Միության հետ ստորագրված պարտավորություններին։ Այս ուղղությամբ մենք կարող ենք շարունակել մեր աշխատանքները Հայաստանի հետ, քանի որ ուզում ենք Հայաստանին տալ հնարավորություններ, տարբերակներ, որոնցից կարելի է ընտրել այն բնագավառները, որտեղ կարելի է համագործակցել Արևմուտքի հետ, Եվրոպայի ու ԱՄՆ-ի հետ, ինչպես նաև` Ռուսաստանի, որը, ես հասկանում եմ, երկար տարիներ է եղել Հայաստանի գործընկերը։ Մաքսային Միությանը միանալու որոշման մասին հայտարարելուց հետո, Հայաստանի Նախագահը նաև շատ կարևոր ազդանշան տվեց ԱՄՆ-ին ու Եվրոպային, որ Հայաստանը ցանկանում է մնալ գործընկեր մեզ հետ։ Օրինակներից մեկը կարելի է համարել Որոտան գետի վրա հիդրոէլեկտրակայանների համալիրի գնման վերաբերյալ ամերիկյան «Քոնթուր Գլոբալ» ընկերության հետ համաձայնագիրը: Խոսքը շատ կարևոր էներգետիկ բնագվառի մասին է, որտեղ նախապես գերիշխում էին ռուսական հաստատությունները»,- ասել է Ջոն Հեֆֆերնը` հույս հայտնելով, որ գործարքն ավարտին հասցնելով, այն մեծ ազդանշան կլինի ամերիկացի ու Արևմուտքի երկրների ներդրողների համար, և կօգնի ապացուցելու, որ Հայաստանը բաց է բիզնեսի համար։

Հայաստանում ԱՄՆ դեսպանը, պատասխանելով Լեռնային Ղարաբաղի հակամարտության լուծման գործընթացին առնչվող հարցին, համաձայնել է, որ այն հայտնվել է «պատային» (շախմատային եզրույթ-խմբ.) իրավիճակում։ «Այդպես կարելի է ասել, սակայն պետք է ասեմ նաև, որ Մինսկի խմբի ամերիկացի համանախագահ Ջեյմս Ուորլիքն ամբողջությամբ տարված է իր պարտականություններով, ով Պետդեպարտամենտից ստացել է հակամարտության կողմերին իրար մոտ բերելու հարցում ջանք չխնայելու առաջադրանք։ Բանակցային գործընթացում շատ քիչ առաջընթաց կա, սակայն Ուորլիքն ունի շատ հստակ պարտավորություն, որ ստեղծվեն երկու կողմերի միջև բանակցությունները խորացնելու պայմաններ»,- ասել է դեսպանը:

Ինչ վերաբերում է հայ-թուրքական հաշտեցման գործընթացը վերսկսելու ուղղությամբ ԱՄՆ դեսպանության գործունեությանը, Հեֆֆերնը նշել է, որ հայ-թուրքական արձանագրություններն իրենց ամենագլխավոր խնդիրներից է։ «Մենք շարունակ հորդորում ենք Թուրքիային բացել սահմանները և հույս ունենք, որ Թուրքիան կգտնի ուղի վավերացնելու համար արձանագրությունները»,- ավելացրել է Ջոն Հեֆերնը:

Իսկ հարցին ի պատասխան` թե որպես Թուրքիայի կարևոր դաշնակից պետություն, ԱՄՆ-ը կհորդորի Թուրքիայի Նախագահին 2015 թվականի ապրիլի 24-ին այցելել Երևան, Հեֆերն ասել է. «Վարչապետ Էրդողանի այս տարվա ապրիլյան հայտարարությունը մի քայլ առաջ էր, չնայած Հայաստանը գտնում է, որ պիտի ավելին արվի։ Մենք կաշխատենք լինել ավելի օգտակար, բայց Թուրքիայի վարչապետն ու Նախագահն իրենք կկայացնեն որոշում այդ մասին»: