«Հրապարակ». Մեր հանրությունը ոչ այնքան կենտրոնանում է բուն երեւույթների վրա, որքան Սերժ Սարգսյանի դեմքի արտահայտության

Մեծ քաղաքականության մեջ կողմնորոշվելու, եզրահանգումներ ու գնահատականներ անելու համար անհրաժեշտ է առավելագույն տեղեկացվածություն, ինչով, բնականաբար, մենք չենք կարող պարծենալ, քանզի շատ գործընթացների մասին դատում ենք մակերեսային տեղեկությունների հիման վրա: Դա է պատճառը, որ մեր հանրությունը ոչ այնքան կենտրոնանում է բուն երեւույթների, ստորագրված պայմանագրերի բովանդակության եւ իրականացված քայլերի հաջորդականության վրա, որքան Սերժ Սարգսյանի դեմքի արտահայտության, Էդվարդ Նալբանդյանի տրամադրության եւ այլ «նյուանսների»:

Մինչդեռ շատ տեղեկացվածություն պետք էլ չէ՝ բավական է վերհիշել, որ «Ռուսաստանն ու ընկերները» մեզ անցած տարի ետ դարձրին եվրոպական ուղուց, ստիպեցին հետ կանգնել Ասոցացման համաձայնագիրը ստորագրելու մտադրությունից, երբ գործընթացը գրեթե ավարտված էր: Բավական է հիշել, որ Ռուսաստանը պարբերաբար զենք է վաճառում Ադրբեջանին՝ դրա անունը «կոմերցիա» դնելով: Զենք, որի գլխավոր թիրախը մենք ենք դառնալու:

Բավական է հիշել, որ մենք հավատարմորեն դեմ քվեարկեցինք Ղրիմի հետ կապված բանաձեւին եւ Ղրիմի «օկուպացիան» ճանաչող հայտարարություն արեցինք, չնայած Ուկրաինայում ստվար հայկական համայնքի գոյությանը եւ նրանց սպառնացող վտանգին: Այդ մենք ենք, որ ռուսական ռազմաբազաները տեղավորել ենք մեր հողում եւ անգամ հոգում ենք դրանց ծախսերը: Նաեւ մեր քաղաքացիների մի ստվար զանգված ապրում է Ռուսաստանում, ծառայում այդ երկրին, բարիքներ ստեղծում այդ երկրում, հարկ վճարում եւ այլն: Եվ եթե հայ ժողովուրդն իր ռազմավարական դաշնակիցն ու դարավոր բարեկամն է համարում ռուսին ու Ռուսաստան պետությունը, մենք իրավունք ունենք ակնկալելու, որ դիմացինն էլ է գնահատում մեր հավատարմությունն ու բարեկամությունը:

Շարունակությունը` «Հրապարակ» օրաթերթի այսօրվա համարում: