ՀՀ առաջին տիկինն ամենաշատը սիրել է «Ոզնին մառախուղում» մուլտֆիլմը

ՀՀ առաջին տիկին Ռիտա Սարգսյանը տոն պարգևեց բազմաթիվ փոքրիկների: Հայաստանի պետական երիտասարդական նվագախումբը մի քանի օր հանդես է գալիս բացառիկ «Քարթուն նոն-ստոպ» (Cartoon Non-Stop) համերգային ծրագրով, որի ընթացքում հնչում են ամենահայտնի և սիրված մուլտֆիլմերի սաունդթրեքները: Մայիսի 31-ին Ալ.Սպենդիարյանի անվան օպերայի և բալետի ազգային ակադեմիական թատրոնում անցկացվեց ևս մեկ լրացուցիչ համերգ' ՀՀ նախագահի տիկին Ռիտա Սարգսյանի բարձր հովանու ներքո: Հատուկ բարեգործական համերգին ներկա էին միայն և միայն երեխաներ:

«Քարթուն նոն-ստոպ» խորագրով համերգների ընթացքում հնչեցին հայտնի մուլտֆիլմերի սաունդթրեքները և մեծ էկրանի վրա ցուցադրվեցին հատվածներ այդ մուլտֆիլմերից: Երեխաներն այդ կերպ տեղափոխվեցին հեքիաթների աշխարհ:

ՀՀ առաջին տիկին Ռիտա Սարգսյանն ընդգծեց, որ Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի հետ վաղուց էին մտածում նման նախագծի մասին: «Մի փոքր էլ ուշացել ենք, բայց կփորձենք ուղղել մեր սխալը և տոնը դարձնել ավանդույթ, որպեսզի երեխաները մոտիկից ծանոթանան սիմֆոնիկ երաժշտությանը: Հրավիրված են Երևանի և տարբեր մարզերի երեխաները: Մասնակցում են փոքրիկներ Գավառից, Գյումրիից, Վանաձորից: Նրանց սպասում է մեկ այլ անակնկալ: «Օջախ» համալիրը պատրաստ է հյուրասիրել նրանց այս համերգից հետո»,- նշեց Ռիտա Սարգսյանը:

ՀՀ առաջին տիկնոջ սիրելի մուլտֆիլմերն այսօր չեն ցուցադրում: «Ես, հավանաբար, ծանոթ չլինեմ այս երաժշտությանը, որովհետև այն մուլտֆիլմերը, որ ես էի դիտում, այժմ, ցավոք, չեն ցուցադրում»,-նշեց Սարգսյանը' հավելելով, որ շատ էր սիրում «Ոզնին մառախուղում» մուլտֆիլմը:

«Մենք բոլորս շատ շնորհակալ ենք ՀՀ առաջին տիկնոջը այսօրվա համերգ-տոնի համար: Մենք սիրով միանում ենք սոցիալական տարբեր ծրագրերի: Տոնի'մանուկների միջազգային օրվան ընդառաջ կազմակերպվեց այս համերգը: Մենք մեծ ոգևորությամբ ենք նվագում մանուկների համար: Փորձում ենք ճիշտ ձևաչափով ներկայացնել սիմֆոնիկ երաժշտությունը: Դրական լիցքերի պակաս ունենք և կփորձենք համերգով այդ լիցքերը հաղորդել»,-նշեց Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:

Սմբատյանն ընդգծեց, որ երեխաներին ներկայացվում է լավագույն երաժշտություն' սիրված մուլտֆիլմերից: «Բոլոր մանուկները, ովքեր առաջին անգամ կլինեն դահլիճում, կզգան ոգևորությունը և տարիներ շարունակ կլինեն այդ երաժշտության ոգեղեն ոլորտում»,-նշեց Սերգեյ Սմբատյանը' հավելելով, որ երեխաների համար մեծ պատիվ է, որ նրանց համերգին մասնակցելու է հրավիրել առաջին տիկինը: «Նման նախագծերը նպաստում են, որ մենք ունենանք պայծառ ապագա»,-եզրափակեց Սմբատյանը:

Երևանի 124-րդ դպրոցի աշակերտուհի Սոնա Վարդանյանը համերգի ընթացքում ունկնդրեց իր սիրելի «Գեղեցկուհին և հրեշը» մուլտֆիլմի սաունդթրեքը: «Բոլորս հիացանք այս միջոցառմամբ: Նկատեցի, որ բոլորն ուշադրությամբ լսում էին երաժշտությունը: Շնորհակալություն եմ հայտնում Ռիտա Սարգսյանին' մեր օրը տոն դարձնելու համար»,-նշեց Սոնա Վարդանյանը:

Երեխաների սիրելի մուլտֆիլմերի սաունդթրեքները փոքրիկներին մատուցվեցին Հայաստանի պետական երիտասարդական նվագախմբի կատարմամբ: ՀՊԵՆ-ի նոր համերգային ծրագրի մեկնարկը տրվեց մայիսի 30-ին: Նոր համերգային ծրագիրը արդեն սիրված «Հոլիվուդ նոն-ստոպ» համերգաշարի շարունակությունն է: «Հոլիվուդ նոն-ստոպ»-ը հանդիսատեսի կողմից սիրված և սպասված ծրագիր է, որը մեկնարկել է 2012 թվականին և ներկայացվել երևանյան 8 բուհերում, որտեղ ավելի քան 6000 ուսանողներ ունկնդրել են հոլիվուդյան ֆիլմերի երաժշտությունը։ 2013 թվականին «Հոլիվուդ նոն-ստոպ»-ը ներկայացվել է նաև հանրապետության մարզերում, մասնավորապես՝ Գյումրիում, Վանաձորում, Եղեգնաձորում, Արտաշատում։ Այս քաղաքներում հանդիսատեսը մեծ ոգևորությամբ է ընդունել Հայաստանի պետական երիտասարդական նվագախմբի ելույթները՝ բարձր գնահատելով ինչպես հոլիվուդյան ֆիլմերի մեղեդիների կատարումները, այնպես էլ դասական երաժշտությունը մարզերում ներկայացնելու Հայաստանի պետական երիտասարդական նվագախմբի ջանքերը։