Մեկնարկում է ԲարՔեմփ Երևան 2014-ը

Այսօր ժամը 10.00 բացվեց Երևանյան 6-րդ Բարքեմփը, որը մասնակցում են տեղեկատվական տեխնոլոգիաների ոլորտի ավելի քան հազար հարյուր մասնագետ՝ ծրագրավորողներ, ճարտարագետներ, օն-լայն լրագրողներ և սոցիալական ցանցերի ակտիվիստներ։

Հայաստանյան ՏՏ ոլորտի յուրահատուկ ոչ պաշտոնական կոնֆերանսի մասնակիցները այս տարի կրկին հնարավորություն կունենան նոր գիտելիքներ և հմտություններ ձեռք բերել' մասնակցելով ԲարՔեմփի հատուկ հյուրերի կողմից վարվող վարպետության դասընթացներին, ելույթ ունենալ' կիսվելով սեփական փորձով, քննարկել համացանցային տեխնոլոգիաներ, ծրագրավորման կիրառական խնդիրներ:

ԲարՔեմփ Երևան 2014-ի գլխավոր հովանավորն է U!com ընկերությունը: Այս տարի Յուքոմ ընկերությունը որոշեց սատարել կազմակերպչական թիմին, քանի որ ընկերությունը մշտապես կանգնած է նորարար գաղափարներով և ապագայի լուծումներ առաջարկող երիտասարդ հայ մասնագետների կողքին, իսկ Բարքեմփը նորարարություններն ի մի բերելու, նոր հետաքրքիր մտքեր շուկա մտցնելու հետաքրքիր հարթակ է:

Հովանավորներն ու գործընկերներն են PicsArt ընկերությունը, Մեդիա նախաձեռնությունների կենտրոնը (նախկին Ինտերնյուս):

Չկոնֆերանսն անցնելու է Ամերիկյան Համալսարանի հինգ լսարաններում, որոնք ամբողջությամբ հագեցված կլինեն «Յուքոմի» արագագործ ինտերնետով: Լսարաններից կլինի նաև ինտերնետային ուղիղ միացում այն մարդկանց համար, ովքեր, չեն կարող ֆիզիկապես ներկայանալ:

(Չ)կոնֆերանսին մասնակցելու համար կարելի է գրանցվել ԲարՔեմփ Երևանի կայքում՝ www.barcamp.am: Բարքամփ Երևանը կարելի է գտնել Ֆեյսբուքում' https://www.facebook.com/barcampevn, Թվիթերում' հետևելով @barcampam օգտագործողին և գրառումներ անելով #barcampevn14 հեշթեգով:

ԲարՔեմփը ոչ ֆորմալ մթնոլորտում բաց քննարկումներ և մտքերի ազատ փոխանակում ապահովող միջոցառման ձևաչափ է: ԲարՔեմփ Երևան միջոցառումները ամբողջությամբ կազմակերպվում են կամավորների ջանքերով, ովքեր հայաստանյան տեղեկատվական տեխնոլոգիաների և մեդիա ոլորտի ներկայացուցիչներ են: ԲարՔեմփ Երևանն անցկացվում է 6-րդ տարին անընդմեջ: