Ծխելու դեմ պայքար Սիրահարների այգում՝ երիտասարդներին հասանելի լեզվով

Երաժշտություն, երիտասարդական ակտիվություն, լավ ժամանց և ծխախոտի վնասակար ազդեցության մասին հարուստ նյութ. մայիսի 31-ին այս տրամադրություններով անցկացվեց «Եղիր ազատ առանց ծխախոտի» խորագրով համերգային ծրագիրը:

Այն կազմակերպել էր «Եղիր տեղեկացված» ՀԿ-ն Հայաստանի երիտասարդական հիմնադրամի՝ որպես ՀՀ նախագահի գործընկեր կազմակերպության հայտարարած դրամաշնորհային մրցույթի շրջանակներում։

Համերգի մասնակիցները՝ Հասմիկ Կարապետյանը, Նարինե Դովլաթյանը, Կիմ Գրիգորյանը, DJ Serjo-ն, DJ Vakcina-ն, The Band-ը, DerHova-ն, Eva-ն, անձամբ էին կոչ անում երիտասարդներին զերծ մնալ ծխելու վատ սովորությունից: Նրանց կատարումների ընթացքում պարբերաբար հնչում էին ծխելու վնասակար ազդեցության, հիվանդությունների և տարաբնույթ վնասների մասին տեղեկություններ:

DJ Vakcina-ն, կարևորելով ծխելու դեմ պայքարում քարոզչության ապահովումը, նշեց. «Մեր նպատակն է մարդկանց առավելագույնս իրազեկել ծխախոտի վնասակար ազդեցության մասին, թե ինչպես կարելի է թողնել ծխելը: Սակայն մեր խնդիրը ոչ միայն ծխելու դեմ պայքարն է, այլ առողջ ապրելակերպի քարոզումը, քանի որ ինչքան էլ ասենք՝ ոչ ծխախոտին, ակամայից ծխախոտն է գովազդվում»:

Իրազեկման համերգի ընթացքում ներկա երիտասարդներին բաժանվեցին տեղեկատվական թերթիկներ ծխելու վնասակար ազդեցության մասին: Երիտասարդ հեծանվորդներն էլ տեղեկատվական թերթիկները նախապես տարածել էին ողջ քաղաքով մեկ:

DJ Vakcina-ն վստահ է, որ ծխելու դեմ պայքարը արդյունք կտա, եթե ապահովվի գրագետ քարոզչություն: Ըստ նրա՝ երիտասարդների շրջանում քարոզը պետք է տարվի երիտասարդներին հասկանալի լեզվով՝ երաժշտության և լավ ժամանցի միջոցով։ Նա նաև ընդգծեց, որ տարիների իր աշխատանքը տվել է արդյունքներ. իր ընկերներից շատերը թողել են ծխելը։

«X Factor» երաժշտական հեռուստաշոուի հաղթող Կիմ Գրիգորյանը անկեղծորեն նշեց, թե ծխելու՝ 9 տարվա «փորձ» ունի, բայց նաև տեղեկացրեց. «Սիրելիիս խոստացել եմ, որ այսօրվանից թողնելու եմ ծխելը, քանի որ դա վնասելու է առաջին հերթին այն փոքրիկին, որ հետագայում լույս աշխարհ է գալու»:

Ըստ Կիմ Գրիգորյանի՝ ծխելու դեմ պայքարի ամենաարդյունավետ ձևը կամքի ուժի դրսևորումն է ու երեխայի՝ ճիշտ դաստիարակությունը. «Ծնողի հետևողականությունը ամենափոքր տարիքից սկսած, ճիշտ դաստիարակությունը կարծում եմ ծխելու դեմ պայքարի ամենաարդյունավետ միջոցն է»: