Գալուստ Սահակյանը հիշել է մանկությունը (տեսանյութ)

Մի շարք բարձրաստիճան պաշտոնյաներ տարբեր վայրերում փոքրիկների հետ նշել են նրանց պաշտպանության օրը:

Ռազմական գերատեսչությունը վերածվել է խաղահրապարակի: Հունիսի 1-ին ՊՆ տարածքում զինվորականների երեխաներն են: Փոքրիկները հավաքվել են նախարարության բակում` նկարում են, երգում ու պարում: Առաջին հերթին ցանկություններն են: Ջունիորներն իրենց մաղթանքներն են հղում աշխարհին ու մարդկությանը: Գրում է armnewstv.am-ը:

Ամեն տարի Պաշտպանության նախարարությունը երեխաների օրվա առթիվ համերգի է հրավիրում աշխատակիցներին ու նրանց երեխաներին: Ֆայտոնն ու գնացքը երեխաներին ներկայացնում են այն շենքը, որտեղից ղեկավարվում է Հայաստանի պաշտպանությունը, պատմում հայերի սխրանքների մասին: Գեներալ-լեյտենանտ Ապրիամովը թոռնիկի հետ է: Եկել է ողջունելու զինծառայողներին ու շնորհավորելու փոքրիկներին:
Բաց են նաև խորհրդարանի դռները: Օրենսդիրի շենքի բակը մանկաշատ է: Մանուկ պատվիրակների մի խումբ էլ հյուրընկալում են Ազգային ժողովի նախագահն ու պատգամավորները: Ազգային ժողովի բակում օրվա հերոսներին դիմավորում են հեքիաթի հերոսները: Այգու ատրակցիոնները, պաղպաղակն ու հյութերը մինչև երեկո անվճար են բոլորի համար: Օրենսդիրի ղեկավարի մաղթանքը երեխաներին մեկն է' անամպ ու անհոգ մանկություն, ինչպես ինքն է ունեցել:

Տոնախմբությունը շարունակվում է, իսկ Գալուստ Սահակյանը շտապում է մայրաքաղաքի ամենամանկական վայրերից մեկը: Ազգային ժողովի նախագահը շրջեց մանկական երկաթուղում ու զրուցեց երեխաների հետ: Այստեղ էլ Գալուստ Սահակյանին առաջինը ողջունեցին News.am-ի կազմակերպած բարեգործական ակցիայի մասնակիցները: Պաղպաղակի վաճառքից ստացված հասույթը տրամադրելու են Քարվաճառի դպրոցի երեխաներին: Նրանց համար գնելու են պայուսակ ու գրենական պիտույքներ:

Հաջորդ կանգառը Հաղթանակ զբոսայգում է: Այստեղ փոքրիկներին քաղաքապետն է ողջունում: Տարոն Մարգարյանն իր որդիների հետ շրջեց ու շնորհավորեց մանուկներին: Քաղաքապետը որդուն նստեցրեց կարուսել, հիշեց մանկությունը: Զբոսայգին այսօրվանից ամբողջովին երեխաների տրամադրության տակ է, գունավոր ու էքստրեմալ' կարուսելները միացրել են շարժիչները:

Տեսանյութը` armnewstv.am-ի.