Երեխաների պաշտպանության միջազգային օրը սյունեցի փոքրիկների համար անցկացվեցին տոնական միջոցառումներ

Սյունեցի մանուկների տոնը հետաքրքիր ու անմոռանալի դարձնելու համար մարզի խոշոր համայնքներում հունիսի 1-ին' Երեխաների պաշտպանության միջազգային օրը, կազմակերպվել էին տոնական բազմաթիվ միջոցառումներ, որոնք հագեցած էին անակնկալներով, մրցանակներով ու նվերներով:

Առանձնակի ուշադրություն էր ցուցաբերվել մարզի մինչեւ 14 տարեկան հաշմանդամ եւ ծնողազուրկ երեխաներ նկատմամբ, որոնց համար մարզպետ Վահե Հակոբյանը եւ «Լեռնահայաստան» հիմնադրամը պատրաստել էին նվերներ' քաղցրավենիքներով: «Անշուշտ, մեր պարտքն է անել հնարավորը մեր մանուկների հուսալի ապագայի համար, քանի որ նրանցով է առավելապես պայմանավորված ոչ միայն մեր կյանքի իմաստը, այլեւ մեր լինելիությունը», - տոնի առիթով երեխաներին ուղղված իր ուղերձում նշել էր Սյունիքի մարզպետը:

Տոնական միջոցառումները մարզկենտրոնում սկսվեցին առավոտյան' Կապանի Գարեգին Նժդեհ հարապարակում' օրվան նվիրված «Պարային կոմպոզիցիայով», որին մասնակցեցին քաղաքի մշակույթի կենտրոնի պարի խմբերի սաները: Այն ավարտվեց երազանքների փուչիկների բացթողնմամբ, որից հետո մշակույթի կենտրոնի հարակից հրապարկում անցկացվեց կավճանկարչության մրցույթ: Փոքրիկների' ասֆալտին արված նկարներում գերակշռում էին կապույտ երկինքը, պայծառ արեւն ու ժպտացող մայրիկը:

Հրապարակում ընթերցվեց Կապանի քաղաքապետ Աշոտ Հայրապետյանի շնորհավորանքի խոսքը' ուղղված երեխաներին, որում, մասնավորապես, նշված էր. «Տոնի առիթով ջերմորեն շնորհավորում եմ բոլորիդ, ցանկանում, որ միշտ շրջապատված լինեք սիրով, հոգատարությամբ ու ջերմությամբ, որ ձեր գլխավերեւում թեւածի խաղաղությունը, որ ձեր մանկությունը լինի հեքիաթային, անհոգ ու գունեղ, լուսավոր ու պայծառ»:

Օրվա առիթով Կապանում անցկացվեց նաեւ շախմատի մանկական առաջնություն, մշակույթի կենտրոնի մեծ դահլիճում կազմակերպվեց մանկական ֆիլմի ցուցադրություն: Միջոցառումները շարունակվեցին քաղաքի Վ.Սարգսյանի անվան մանկական զբոսայգու ամառային բացօթյա դահլիճում' տոնական մանկական մեծ համերգային ծրագրով: Այստեղ կազմակերպվել էր նաեւ երեխաների գեղանկարչական եւ ձեռքի աշխատանքների ցուցահանդես:

Երեխաների տոնին նվիրված միջոցառումները Կապանում հովանավորել էին քաղաքապետարանը եւ «Վորլդ Վիժն» ԲԿ Կապանի տարածքային զարգացման ծրագրի գրասենյակը: Քաղաքապետարանի նախաձեռնությամբ հունիսի 1-ին Կապանի մանկական զբոսայգու կարուսելներն ամբողջ օրը կաշխատեն անվճար: