Հունիսի 1-ի առթիվ Հովհաննես Մանուկյանն այցելեց «Աբովյան» ՔԿՀ-ում գտնվող դատապարտյալներին

Երեխաների պաշտպանության միջազգային օրվա կապակցությամբ Հայաստանի Հանրապետության արդարադատության նախարար Հովհաննես Մանուկյանն այցելեց «Աբովյան» քրեակատարողական հիմնարկ: Նախարարը շրջեց քրեակատարողական հիմնարկի տարածքում, ծանոթացավ պայմաններին, զրուցեց դատապարտյալների հետ:

Այնուհետև նախարարը մասնակցեց երեխաների պաշտպանության միջազգայն օրվա կապակցությամբ հիմնարկում կազմակերպված միջոցառմանը, ինչպես նաև Վերջին զանգի արարողությանը, որը կազմակերպվել էր այն դատապարտյալների համար, ովքեր այս տարի ավարտել են դպրոցը: Ողջունելով բոլորին՝ Հովհաննես Մանուկյանը նշեց, որ այս օրը խորհրդանշական է, որովհետև այս օրը պարզապես տոն չէ: «Սա մի օր է, երբ մենք ևս մեկ անգամ պարտավոր ենք վերաիմաստավորել մեր վերաբերմունքը երեխաների նկատմամբ: Մենք պարտավոր ենք մտածել, հասկանալ՝ արդյոք արել ենք ամեն ինչ, որպեսզի մեր երեխաներն ունենան ապահով հայրենիք, մեր երեխաներն ապրեն խաղաղ երկնքի տակ և ունենան երջանիկ մանկություն»,- ասաց նախարարը:

Նախարարն ընդգծեց, որ Հայաստանի նոր կառավարությունը ընդամենը մեկ ամսեկան է,և ինքը՝ որպես այդ կառավարության անդամներից մեկը, ցանկանում է հավաստիացնել, որ կառավարության համար առաջնային խնդիր է երեխաների համար բարգավաճ, ապահով և պայծառ երկիր ստեղծելը: «Եթե մենք կարողանանք ինչ-որ ժամանակ հետո մեր այսօրվա սերնդին փոխանցել շատ ավելի երջանիկ երկիր, դա նշանակում է, որ մենք այսօր մեր խնդիրը կատարել ենք»,- նշեց Մանուկյանը:

Նախարարն ընդգծեց, որ այսօր մեր երկիրն ունի շատ խնդիրներ, սակայն պետք է հասկանալ, որ մեր ժողովուրդը ունեցել է շատ ավելի դաժան պատմություն: «Այսօր մեր երեխաները, որոնց կողքին մենք կանգնած ենք, որոնց կողքին մենք արարում ենք, քիչ թե շատ պաշտպանված են և քիչ թե շատ ապահով են: Մենք պետք է ավելի շատ մտածենք այն երեխաների մասին, ովքեր վատ սոցիալական պայմաններում են ապրում, այն երեխաների, որոնք չունեն ծնողներ և ապրում են մանկատներում, երեխաներ, ովքեր ճակատագրի բերումով գտնվում են այստեղ իրենց ծնողների հետ: Ես կարծում եմ, որ մենք շեշտը պետք է ավելի շատ դնենք երեխաների հենց այս խմբերի վրա և մեր ուժերի ներածին չափով կարողանանք աջակցել նրանց, գոնե այս օրը պայծառ դարձնենք նրանց առօրյան».- նշեց նախարարը:

Հովհաննես Մանուկյանը նշեց, որ ինքը ցանկացել է Երեխաների պաշտպանության միջազգային օրը նշել քրեակատարողական հիմնարկի դատապարտյալների հետ: «Շնորհավորում եմ ձեզ բոլորիդ, ցանկանում եմ, որ ձեր երեխաներն ապրեն խաղաղ և բարգավաճ երկրում: Բացի այն փոքրիկներից, ովքեր իրենց դատապարտյալ ծնողների հետ այստեղ են, ցանկանում եմ շնորհավորել այն անչափահասներին, ովքեր ժամանակավոր այստեղ են գտնվում և նաև այն երիտասարդներին, ովքեր ավարտում են դպրոցը և կյանքի նոր փուլ են մտնում: Ես ձեզ վստահեցնում եմ, որ մենք մտածում ենք ձեր մասին և հետևում ենք գործընթա ցներին և անելու ենք ամեն ինչ, որպեսզի քրեակատարողական հիմնարկում նորմալ պայմաններ լինեն»,- եզրափակեց նախարարը:

«Աբովյան» քրեակատարողական հիմնարկի պետ Արամ Սարգսյանը, ողջունելով հյուրերին, շնորհավորեց հիմնարկում իրենց պատիժը կրող անչափահասներին: «Շնորհավորում եմ ձեզ տղաներ, առողջ եղեք և հիշեք, որ հայ տղամարդու համար կան կարևոր պատգամներ՝ պետք է տուն կառուցի, երեխաներ մեծացնի, ավելացնեմ՝ քավոր պետք է լինի ու իր ծնողների համար երջանիկ կյանք ապահովի»,- ասաց նա:

Արամ Սարգսյանը շնորհավորեց նաև հիմնարկում գտնվող մինչև երեք տարեկան երեխաների տոնը, ովքեր այդտեղ են իրենց դատապարտյալ մայրերի հետ: «Սիրելի կանայք, ձեզանից շատերը երեխաներ ունեն, թող նրանց տոնը շնորհավոր լինի: Մենք ունենք 4 տղա, ովքեր ավարտում են դպրոցը, թող նրանց տոնն էլ շնորհավոր լինի»,- ասաց Սարգսյանը:

Հովհաննես Մանուկյանը զրուցեց քրեակատարողական հիմնարկի անչափահաս դատապարտյալներից մեկի հետ, ով նոր ավարտում է դպրոցը: Շրջանավարտը նախարարին պատմեց, որ հիմնարկից դուրս գալուց հետո ցանկանում է ուսումը շարունակել որևէ բուհում: Նախարարն էլ հորդորեց անպայման դիմել իրեն, եթե դուրս գալուց հետո ինչ-որ խնդիրներ կունենա:

Այնուհետև ՀՀ արդարադատության նախարար Հովհաննես Մանուկյանը նախարարության աշխատակազմի անունից նվերներ հանձնեց անչափահաս դատապարտյալներին և իրենց մայրերի հետ հիմնարկում գտնվող փոքրիկներին՝ գնդակներ, տարատեսակ խաղալիքներ, սպորտային համազգեստ: