Խորհրդարանն ուշադրության կենտրոնում է պահում միջազգային կառույցներում ԼՂ հակամարտության վերաբերյալ քննարկումները. Գալուստ Սահակյան

ՀՀ ԱԺ նախագահ Գալուստ Սահակյանը հունիսի 2-ին Կարեն Դեմիրճյանի անվան մարզահամերգային համալիրում մասնակցել է ՀՀ ԱԳՆ ղեկավար կազմի և դիվանագիտական ներկայացուցչությունների ղեկավարների հավաքին: Ինչպես տեղեկացնում են  ՀՀ ԱԺ հասարակայնության և տեղեկատվության միջոցների հետ կապերի վարչությունից, դիմելով ներկաներին՝ ԱԺ նախագահն ասել է.

«Հարգելի պարոն նախարար, դիվանագիտական կորպուսի հարգելի ներկայացուցիչներ,

Ողջունում եմ այս կարևոր հանդիպման առիթով: Ավանդական դարձած այս հավաքն արդեն ապացուցել է իր կենսունակությունը, և կարծում եմ, որ այս ձևաչափն ապագայում ևս կնպաստի ՀՀ արտաքին քաղաքականության խնդիրների քննարկմանը և դրանց նպատակային ու համակարգված իրականացմանը:

Գաղտնիք չէ, որ օրենսդրական գործունեությանը զուգահեռ, ՀՀ Ազգային ժողովը շարունակաբար իր նպաստն է բերում տարբեր ոլորտներում երկրի միջազգային համագործակցության խթանմանը: Ազգային ժողովը համապատասխան ձևաչափով մասնակցում է արտաքին հարաբերություններին առնչվող գործընթացներին' ընդլայնելով միջխորհրդարանական կապերը` զարգացնելով հարաբերությունները տարբեր միջազգային կառույցների հետ, ներդաշնակեցնելով Հայաստանի Հանրապետության օրենսդրությունը միջազգային չափանիշներին, վավերացնելով երկկողմ ու բազմակողմ պայմանագրեր:

ՀՀ Ազգային ժողովը ակտիվ մասնակցություն ունի օտարերկրյա խորհրդարաններում և տարբեր միջազգային կառույցներում ՀՀ արտաքին քաղաքական կարևորագույն խնդիրներին միջազգային հնչեղություն հաղորդելու գործում, մասնավորապես, Լեռնային Ղարաբաղի հիմնախնդրին, Հայոց ցեղասպանության միջազգային ճանաչմանը և հայ-թուրքական հարաբերություններին առնչվող հարցերում:

Այսօր մենք կարևոր պատմական իրադարձության շեմին ենք' պատրաստվում ենք Հայոց ցեղասպանության 100-ամյա տարելիցին: Հաշվի առնելով այն հանգամանքը, որ միջազգային հանրության ուշադրությունը 2015թ. սևեռվելու է Հայոց ցեղասպանության 100-ամյա տարելիցին՝ մենք բոլորս մեր ուժերը պետք է համատեղենք Հայոց ցեղասպանության ճանաչմանն ուղղված գործընթացին: Մենք՝ խորհրդարանականներս, կանենք հնարավոր ամեն ինչ բոլոր միջազգային խորհրդարանական կառույցներում Հայոց ցեղասպանության ճանաչման հարցը ևս մեկ անգամ արծարծելու և ցեղասպանությունը՝ որպես մարդկության դեմ ուղղված չարիք, դատապարտելու ուղղությամբ: ՀՀ Ազգային ժողովը կաջակցի նաև այն բոլոր նախաձեռնություններին, որոնք ուղղված կլինեն Հայոց ցեղասպանության դատապարտմանն ուղղված քննարկումների, համաժողովների կազմակերպմանը:

Ազգային ժողովն իր ուշադրության կենտրոնում է պահում նաև միջազգային կառույցներում Լեռնային Ղարաբաղի հակամարտության վերաբերյալ քննարկումները: Ցանկանում եմ նշել, որ վերջին տարիների ընթացքում հիշյալ խնդիրները մեր խորհրդարանականների կողմից արդյունավետ կերպով ներկայացնելուն մեծապես նպաստել է ՀՀ ԱԳՆ-ի հետ իրականացված համատեղ աշխատանքը: Սակայն, հաշվի առնելով տնտեսական շահով թելադրված որոշ երկրների դիրքորոշումները մեր երկրի համար կենսական նշանակություն ունեցող խնդիրների շուրջ, միջազգային տարբեր կառույցների խորհրդարանական վեհաժողովներում ՀՀ խորհրդարանական պատվիրակությունների և դիվանագիտական ներկայացուցչությունների միջև ավելի սերտ, համակարգված և փոխլրացնող համագործակցություն ունենալը ժամանակի պարտադրանքն է:

Այս առումով մեծապես կարևորում եմ ինչպես խորհրդարանում ներկայացված բոլոր ուժերի միասնական և գործուն աշխատանքը, այնպես էլ խորհրդարանական պատվիրակությունների ու ԱԳՆ ներկայացուցիչների պարբերական խորհրդատվությունների անցկացումը: Իմ խորին համոզմամբ՝ միջազգային ասպարեզում ՀՀ Ազգային ժողովը զգալի ներուժ ունի մեր երկրի արտաքին քաղաքականության ռազմավարության իրականացման գործում:

Այս առումով, կարևորում եմ խորհրդարանական դիվանագիտությունը՝ որպես միջպետական հարաբերությունների զարգացման հզոր գործոն:

ՀՀ պաշտոնական դիվանագիտությանը զուգահեռ' ՀՀ Ազգային ժողովը կարող է նաև առավել ազդեցիկ ու կառուցողական գործել հատկապես այն դեպքերում, երբ որոշ հանգամանքներից ելնելով սահմանափակված են գործադիր իշխանության հնարավորությունները: Բացի այդ, խորհրդարանը կապող օղակ է պաշտոնական դիվանագիտության ու հասարակության միջև:

Համոզված եմ, որ միայն համատեղ աշխատանքով կարող ենք բարձրացնել մեր պատվիրակությունների աշխատանքի արդյունավետությունը: Թեև ՀՀ ԱԳՆ-ի հետ այս ուղղությամբ համագործակցության հարցում առկա է զգալի առաջընթաց, սակայն դեռևս շատ անելիքներ կան: Առաջարկում եմ ձևավորել համապատասխան աշխատանքային խմբեր' Ազգային ժողովի և արտաքին գործերի նախարարության միջև համագործակցության մեխանիզմների մշակման ու այդ համագործակցությանն առավել ինստիտուցիոնալ բնույթ հաղորդելու համար:

ՀՀ Ազգային ժողովը միջխորհրդարանական համագործակցության մեխանիզմների օգտագործման միջոցով կարող է մեծապես նպաստել Հայաստանի արտաքին քաղաքականության արդյունավետության բարձրացմանը, միջպետական հարաբերությունների զարգացմանը: Մենք շարժվում ենք այդ ուղղությամբ և համոզված ենք, որ համատեղ ու նպատակաուղղված աշխատանքի շնորհիվ մեզ կհաջողվի հասնել մեր ընդհանուր նպատակներին»:

Այնուհետև տեղի է ունեցել պարգևատրման արարողություն: ՀՀ ԱԺ նախագահ Գալուստ Սահակյանի կարգադրությամբ, միջպետական կապերի ամրապնդման և դիվանագիտական աշխատանքում ներդրած մեծ ավանդի համար ՀՀ ԱԺ պատվո մեդալով են պարգևատրվել Լիտվայի Հանրապետությունում ՀՀ արտակարգ և լիազոր դեսպան Արա Այվազյանը, Դանիայի Թագավորությունում ՀՀ արտակարգ և լիազոր դեսպան Հրաչյա Աղաջանյանը, Իտալիայի Հանրապետությունում ՀՀ արտակարգ և լիազոր դեսպան Սարգիս Ղազարյանը և Չեխիայի Հանրապետությունում ՀՀ արտակարգ և լիազոր դեսպան Տիգրան Սեյրանյանը: