Մունդիալ-2014-ին ընդառաջ. ԷԿՎԱԴՈՐ

Էկվադորի հավաքականը Հարավամերիկյան այն թիմերից է, որոնց կարելի է համարել այս Մունդիալի նորեկներ: Որակավորման փուլի արգելքը էկվադորցիները հաղթահարեցին միայն 2000-ական թվականներին: «Եռագույններն» ունեն հրաշալի հարձակման գիծ, իսկ պաշտպանությունը մնում է նրանց «աքիլեսյան գարշապարը»:

Էկվադորցի ֆուտբոլիստները մունդիալներին առաջին անգամ իրենց մասնակցությունը բերեցին կորեա-ճապոնական ԱԱ-ի ժամանակ: Մասնակցած երեք խաղերից միայն մեկում հարավամերիկացիներին հաջողվեց առավելության հասնել, այն էլ` խորվաթների դեմ: Այդ հաղթանակն անգամ չօգնեց թիմին խմբային փուլից դուրս գալու համար: 2006 թվականին Գերմանիայում անցկացված մունդիալում Էկվադորի հավաքականին հաջողվեց մեկ քայլ առաջ գնալ, թիմը դուրս եկավ խմբից, նրա հետագա պայքարը կասեցրին անգլիացիները:

Այս մունդիալում ևս Էկվադորին հեշտ թիմեր չեն բաժին ընկել` Շվեյցարիա, Ֆրանսիա, իսկ Հոնդուրասի մասին խոսելու կարիք չկա:

Վիճակագրությունը վկայում է, որ «եռագույններն» ավելի շատ գնդակ են բաց թողնում (1,61 գոլ ), քան խփում են (1,14 գոլ ): Ընդհանուր առմամբ, անցկացրած 495 խաղերից 227-ը էկվադորցիները տանուլ են տվել, հաղթել` միայն 138-ում, իսկ 130-նն ավարտվել է ոչ-ոքի: Հարավամերիկյան երկրների մեջ Էկվադորը զիջում է 5 թիմերի` Բրազիլիային, Կոլումբիային, Ուրուգվային, Արգենտինային, Չիլիին:

Այս մունդիալում էկվադորցիների խաղային շեշտադրումները կկատարի Ֆելիպե Կայսեդոն, ով որակավորման փուլի 9-ը հանդիպումներում հեղինակել է 7 գնդակ: Ֆուտբոլասերները նրան կոչում են նաև «Ռոկի»: Ֆուտբոլային աշխարհին հայտնի են նաև Էկվադորի հավաքականի ավագ Վալտեր Այովին, ում խաղային փորձը մեծ օգուտ կբերի իր թիմին, Անտոնիա Վալենսիան, ով հանդես է գալիս անգլիական «Մանչեստեր Յունայթեդ»-ում:

Աշխարհի 2014 թվականի առաջնությանը Էկվադորը կներկայանա հետևյալ ընդլայնված կազմով.

Դարպասապահներ` Մաքսիմո Բանգերա («Բարսելոնա Գույակիլ»), Ալեքսանդր Դոմինգես («Կիտո»), Ադրիան Բոնե («Էլ Նասիոնալ»), Պաշտպաններ` Օսկար Բագի («Էմելեկ»), Գաբրիել Աչիլեր («Էմելեկ»), Խորխե Գուագուա («Էմելեկ»), Հոն Հարվաես («Էմելեկ»), Ֆրիկսոն Էրասո («Ֆլամենգո»), Վալտեր Այովի («Պաչուկա»), Խուան Կարլոս Պարեդես («Բարսելոնա Գույակիլ»), Քրիստալ Ռամիրես («Ֆորտունա»), Կիսապաշտպաններ` Սեգունդո Կաստիլյո («Ալ -Հիլալ»), Կառլոս Գրուեսո («Շտուտգարդ»), Ռեբատո Իբարա («Վիտես»), Ֆիդել Մարտինես («Տիխուանա»), Քրիստիան Նոբոա («Դինամո», Ռուսաստան), Պեդրո Կինյոնես («Էմելեկ»), Լուիս Սարիտամա («Բարսելոնա Գույակիլ»), Անտոնիո Վալենսիա («Մանչեստեր Յունայթեդ»), Էդիսոն Մենդես («Սանտա-Ֆե»), Օսվալդո Մինդա («Չիվաս»), Մայքլ Արոյո («Ատլենտե»), Հարձակվողներ` Ֆելիպե Կայսեդո («Ալ-Ջազիրա»), Ջեֆերսոն Մոնտերո («Մորելիա»), Խուան Ռոխաս («Կրուս Ասուլ»), Էներ Վալենսիա («Պաչուկա»), Խեյմե Այովի («Տիխուանա& raquo;), Քրիստիան Պենիլիա («Բարսելոնա Գույակիլ»), Անխել Մենա («Էմելեկ»): Գլխավոր մարզիչն է Ռոյնալդո Ռուեդան:

ՖԻՖԱ-ի վարկանիշային աղյուսակում Էկվադորի հավաքականը զբաղեցնում է 28-րդ հորիզոնականը:

ՖՈՒՏԲՈԼԻ ԱՇԽԱՐՀԻ ԱՌԱՋՆՈՒԹՅԱՆ ՄԵԿՆԱՐԿԻՆ ՄՆԱՑԵԼ Է 10 ՕՐ: