Հայ հանդիսատեսին կներակայացվեն մեծանուն լեհ ռեժիսոր Անջեյ Վայդայի ֆիլմերը

Հայաստանում Լեհաստանի դեսպանատան նախաձեռնությամբ Երևանում կցուցադրվի աշխարհահռչակ լեհ ռեժիսոր Անջեյ Վայդայի վեց ֆիլմերից բաղկացած ֆիլմաշարը: Այն նվիրված է Արևելյան Եվրոպայում առաջին ազատ ընտրությունների 25-ամյակին: «1989 թվականի հունիսի 4-ին Լեհաստանում անցկացվեցին առաջին ազատ խորհրդարանական ընտրությունները, որոնք առանցքային նշանակություն ունեցան նաև Կենտրոնական և Արևելյան Եվրոպայի երկրների համար: Դրան հետևեցին թավշյա հեղափոխությունները Չեխիայում, Լիտվայում, Հունգարիայում և եվրոպական մի շարք այլ երկրներում: Այս պատմական իրադարձությունները փորձեցինք ներկայացնել ոչ թե գիտաժողովների, այլ լեհ անվանի ռեժիսոր Անջեյ Վայդայի ֆիլմերի միջոցով: Լեհերի և հայերի անցյալը շատ նման է իրար, և Վայդայի ֆիլմերի մի շարք դրվագներում դուք ձեր պատմությանը բնորոշ դրվագներ կտեսնեք»,- լրագրողների հետ հանդիպմանը ասաց Հայաստանում Լեհաստանի արտակարգ և լիազոր դեսպան Զդիսլավ Ռաչինսկին` հավելելով, որ Վայդայի ֆիլմերի ցուցադրմամբ իրենք նպատակ ունեն ներկայացնել Լեհաստանը` պատմական և մեր օրերի կտրվածքով:

Կինոգետ Զավեն Բոյաջյանը ներկայացրեց 88-ամյա ռեժիսորի կենսագրությունը և ստեղծագործական գործունեությունը` անդրադառնալով նաև հայ հանդիսատեսի դատին ներկայացվելիք գործերին, որոնք ներկայացնում են Վայդայի ստեղծագործության տարբեր փուլերը: Կինոգետի բնորոշմամբ, Վայդային անվերապահորեն կարելի է համարել լեհական կինոյի վարպետ, ով ստեղծագործում է 50-ական թվականների վերջից սկսած և մինչ օրս շարունակում է իր ակտիվ գործունեությունը: Նրա վերջին` «Վալենսա` հույսի մարդը» ֆիլմը էկրան է բարձրացել 2013 թվականի հոկտեմբերին: Նա հեղինակ է ավելի քան 55 ֆիլմի, որոնցից ավելի քան 40-ը խաղարկային են: 2000 թվականին արժանացել է «Օսկար» մրցանակի, նաև` Կաննի «Ոսկե արմավենի» հեղինակավոր մրցանակների դափներկիր է: Վայդայի ֆիլմերից «Խնկեղեգը» 2009-ին ցուցադրվել է «Ոսկե ծիրան» կինոփառատոնի շրջանակում:

Հունիսի 4-9-ը «Մոսկվա» կինոթատրոնում ցուցադրվելիք վեց ֆիլմերն են «Վալենսա` հույսի մարդը», «Երկաթե մարդը», «Մարմարե մարդը» եռերգությունը, կհաջորդեն «Գետնուղի», «Մոխիր և ադամանդ», «Խնկեղեգ» ֆիլմերը: Մուտքն ազատ է բոլոր ֆիլմերի ցուցադրության ժամանակ` բացառությամբ «Վալենսա` հույսի մարդը» ֆիլմի: