«Հրապարակ». ԱԺ-ին կներկայացվի «Գազի» հանձնաժողովի նախնական եզրակացությունը

Հունիսի 9-ին մեկնարկող ԱԺ հերթական քառօրյայում ԱԺ գազամատակարարման համակարգի գործունեությունն ուսումնասիրող ժամանակավոր հանձնաժողովը որոշել է նախնական եզրակացություն ներկայացնել խորհրդարան մինչ այժմ կատարած աշխատանքների վերաբերյալ, ինչպես նաեւ հաղորդում, որով նպատակահարմար կհամարվի հանձնաժողովի գործունեության շարունակականությունը: Հիշեցնենք, որ այս հանձնաժողովի գործունեության վերջնաժամկետը հունիսին է լրանում, հանձնաժողովը ձեւավորվել եւ առաջին նիստն արել է այս տարվա մարտի 3-ին, սակայն դեռեւս որեւէ որոշում եւ էական արդյունք այն չի արձանագրել: Հանձնաժողովի ՀԱԿ անդամ Արամ Մանուկյանն ասում է, որ ՀՀԿ-ական պատգամավորների կողմից «բացահայտումներ անելու» փորձեր է նկատել:

ԲՀԿ-ական հանձնաժողովական Միքայել Մելքումյանն անգամ գոհ է այդ հանձնաժողովից, իսկ եզրակացությունը լինելու է ուսումնասիրված տարբեր ոլորտների վերաբերյալ. «Ներտնային սպասարկման հետ կապված, սակագների, պետական բաժնեմասի գնահատման եւ այլնի: Դա լինելու է միջանկյալ հաղորդում, վերջնական չի լինելու, որովհետեւ գործունեությունը երկարացնելու հաղորդում է նաեւ դա լինելու»: Իսկ հանձնաժողովի արդյունավետության ցուցանիշները տեսանելի չեն, քանի որ, Մելքումյանի հիմնավորմամբ, նիստերը փակ են: «Առաջ ընկնելով կարող եմ ասել, որ մեր գազաբաշխման համակարգը նախատեսված է միջինը 8 մլրդ խմ-ի համար, բայց հանրապետությունում սպառվում է 1.7 մլրդ, այսինքն՝ փաստացի սպառման ցուցանիշը ամբողջ համակարգի ծախսային արդյունավետությունն իջեցնում է: Ու ինչքան այդ ցուցանիշը մեծանա, ենթադրենք՝ 1.7-ը դառնա 2.7, այնքան սակագնի հետ կապված փոփոխություն՝ իջեցում կլինի»:

Շարունակությոնը` «Հրապարակ» օրաթերթի այսօրվա համարում: