«Հրապարակ». «Հունիսի 1-ը Բալասանյանն ինքն իր համար տոն է սարքել»

Հունիսի 1-ին՝ Երեխաների պաշտպանության օրը, Գյումրիում սովորաբար մանուկներին շքերթի էին հանում, շարքով անցկացնում էին հրապարակով: Վերջին երկու տարիներին այս ավանդույթը վերացել է: Այս տարի երեխաները նվեր ստացան քաղաքապետից: Հունիսի 1-ի կապակցությամբ Սամվել Բալասանյանը տորթեր է բաժանել մանկապարտեզներին, որոնք արտադրված են նրա ընտանիքին պատկանող «Անուշարան» գործարանում, նաեւ հաշմանդամ երեխաներին է հրավիրել գործարան: Երեկ Գյումրիում լուր տարածվեց, թե մանկապարտեզներին բաժանված տորթերով Բալասանյանն ինքն իր համար է տոն սարքել, քանի որ դրանց դիմաց քաղաքապետարանի բյուջեից մոտ 5 մլն դրամ է փոխանցվել «Անուշարան» ձեռնարկությանը:

Երեկ քաղաքապետարանին մոտ աղբյուրը հաստատեց փոխանցման մասին լուրը: «Սամվել Բալասանյանն իր կողմից է այդ փոքրիկ նվերն արել երեխաներին: Չարժե այս մասին գրել: Դա եղել է նրա անձնական նախաձեռնությունը եւ կապ չունի քաղաքապետարանի բյուջեի հետ: Իսկ 5 մլն դրամի մասին լուրերն ուղղակի հերյուրանք են»,- ասաց Բալասանյանի մամուլի քարտուղար Զոհրապ Եգանյանը, հիշեցնելով, որ Բալասանյանի դեմ անընդհատ ինտրիգներ են հյուսվում, եւ ամենալավ նախաձեռնություններն անգամ ոմանք փորձում են սեւացնել:

Քաղաքում, սակայն, չեն մոռացել նախակրթարանների «սննդի գործը», որը հարուցվեց այն բանից հետո, երբ լրագրողները բացահայտեցին, որ Գյումրիի մանկապարտեզներին սնունդ է մատակարարվել շուկայականից՝ որոշ սննդատեսակների համար մինչեւ 200 տոկոս բարձր գներով: Սնունդ մատակարարող ՍՊԸ-ն պատկանում էր քաղաքապետի որդու՝ Միսակ Բալասանյանի ընկերոջը՝ Յուրա Նազարյանին: Այս գործի նախաքննությունը դեռեւս ավարտված չէ:

Շարունակությունը` «Հրապարակ» օրաթերթի այսօրվա համարում: