«Հրապարակ». Նոր կառավարությունը հետեւողականորեն նահանջեց նախկին կառավարության ծրագրային խոստումներից

Այն, որ նոր կառավարությունը, առանց ավելորդ հավակնությունների, հետեւողականորեն նահանջեց նախկին կառավարության ծրագրային խոստումներից, արդեն իսկ փաստ է` արտացոլված կառավարության գործունեության 2014թ. ծրագրում: Իհարկե, դժվար է ասել, թե որն է ավելի վատ' խոստանալ եւ չանե՞լ, թե՞ ոչ խոստանալ, ոչ անել: Առաջինի դեպքում հույսը մեռնում է վերջում, երկրորդի դեպքում ի սկզբանե ոչ հույս կա, ոչ սպասում: Նախկին ծրագիրը, օրինակ, 2013-2017թթ. ընթացքում խոստանում էր ապահովել ավելի քան 100 հազար նոր աշխատատեղ, ինչը նշանակում էր, որ նշյալ ժամանակահատվածում գործազրկությունը Հայաստանում պետք է կրճատվեր գրեթե կիսով չափ (2013թ. այն կազմել է 224,6 հազ. մարդ): Ամրագրված էր նաեւ կենսաթոշակների բարձրացման չափը' աղքատության գծի առնվազն 125%-ի չափով, ինչպես նաեւ աղքատության կրճատում 8-10%-ով:

Այս չափորոշիչներից նոր ծրագրում ամրագրվել է միայն աղքատության կրճատման 10%-ի խոստումը: Թե ինչպես պետք է կրճատվի աղքատությունը, երբ կոնկրետ աշխատատեղերի ստեղծման վերաբերյալ թվային գոնե ամենամոտավոր ցուցանիշ անգամ չի ներկայացվում, դժվար է պատկերացնել: Մենք կարո՞ղ ենք ենթադրել, որ աղքատության ցուցանիշը, եթե անգամ այդչափ կրճատվի, ապա կկրճատվի բացառապես արտագաղթի հաշվին, իսկ լավագույն դեպքում' ժամանակավոր արտագնա աշխատանքի: Հավանաբար, կառավարությունը հաշվի է առել, որ Մաքսային միությանն անդամակցությունը մեր հայրենակիցների առջեւ լայնորեն կբացի Ռուսաստանի դռները, եւ աղքատությունը մեր երկրից «հեչի պես» մի 10%-ով կնվազի: Փաստորեն, աղքատությունն այն «ղզլբաշն» է, որի «անիծած, չար շունչը» մեր երկրից պիտի հալածենք «ռսի օրհնած ոտով»: Այլ հաշվարկ եւ տրամաբանություն այս ցուցանիշի հիմքում, կարծում ենք, չկա: Եթե լիներ, ապա վստահ եղեք' կներկայացվեր: 

Շարունակությունը` «Հրապարակ» օրաթերթի այսօրվա համարում: