«Հրապարակ». «Հրաշալի քառյակը» և 12 կետից բաղկացած պահանջագիրը

Երեկ հրաշալի կոչվող քառյակը շուրջ չորս ժամ տեւած նիստից հետո ուշագրավ հայտարարությամբ հանդես եկավ: «Ժառանգություն» խմբակցության նախագահ Ռուբեն Հակոբյանը հանդիպման ավարտից հետո հայտարարեց, որ քառյակը որոշել է մինչեւ աշուն ժամանակ տալ իշխանություններին, իսկ նիստում քննարկվել են իշխանություններին ներկայացվելիք պահանջները. քառյակը ձեւավորել է 12 կետից բաղկացած պահանջագիր, որը վերաբերում է ՀՀ տնտեսությանն ու քաղաքականությանը: Ըստ Հակոբյանի՝ իրենք իշխանություններին եւ կառավարությանը ժամանակ են տալիս մինչեւ աշուն իրականացնելու իրենց ներկայացրած պահանջները, որից հետո պարզ կդառնան իրենց կողմից իրականացվելիք քայլերը:

Միասնական հանրահավաքը եւս թողնվել է աշնանը՝ սեպտեմբերի վերջ կամ հոկտեմբերի սկիզբ: Ուշագրավ է նաեւ, որ պահանջների շարքում արտաքին քաղաքականության վերաբերյալ դրույթ չկա, հանդիպման մասնակիցները երեկ չցանկացան մանրամասնել, թե ինչ պահանջների մասին է խոսքը, որովհետեւ առաջիկայում պատրաստվում են ասուլիս կազմակերպել, սակայն, որոշ տեղեկություններով, պահանջները վերաբերում են 100 տոկոս համամասնական ընտրակարգին անցում կատարելուն, կուտակային բաղադրիչը վերացնելուն, ընդդիմությանը վերահսկող լծակներ շնորհելուն եւ այլն: Նշենք նաեւ, որ քառյակը, այսուհանդերձ, շարունակում է անողոք գտնվել նախկին վարչապետ Տիգրան Սարգսյանի գործունեության նկատմամաբ եւ դեմ է քվեարկելու անցած տարվա բյուջեի կատարողականին, որի քննարկումը երեկ ավարտվեց ԱԺ հանձնաժողովներում եւ քվեարկության կդրվի ԱԺ առաջիկա լիագումար նիստում:

Շարունակությունը` «Հրապարակ» օրաթերթի այսօրվա համարում: