Զոհվածների ընտանիքները պահանջում են չմասնատել խորտակված «Սևոլ» լաստանավի կմախքը

Հարավային Կորեայի «Սևոլ» լաստանավի խորտակման հետևանքով զոհվածների հինգ ընտանիքներ պահանջագիր են հղել դատախազություն խորտակված նավի կմախքն անձեռնմխելի թողնելու խնդրանքով՝ պահպանելու այն վկայությունները, որոնք անհրաժեշտ են աղետի պատճառները պարզելու համար: Այս մասին հաղորդել է «Չոսոն իլբո» թերթը:

Ըստ թերթի տվյալների` զոհվածների ընտանիքները համաձայնել են, որ բացվեն նավախցիկներն այն 16 հոգու որոնման համար, որոնց մարմինները դեռևս գտնված չեն, բայց պահանջում են անձեռնմխելի թողնել մեքենայական բաժանմունքը, բալաստային ցիստեռնները, բեռնային հատվածամասերը և կմախքի մյուս մասերը:

Տուժածների ևս երկու ընտանիք առանձին հանրագիր է հղել որոնողական-փրկարարական աշխատանքների բոլոր ձայնագրություններին և այն նյութերին ծանոթանալու հնարավորություն ստանալու նպատակով, որոնք վերաբերում են դատախազության կողմից «Չհոնհեչժին հեուն» նավագնացային ընկերության գործունեության հետաքննությանը, որը եղել է լաստանավի գործարկուն:

Ինչհոն նավահանգստից Չեջուդո կղզի մեկնած «Սևոլ» լաստանավը՝ 6 հազար 825 տոննա ջրատարողությամբ, ջրասույզ է եղել ապրիլի 16-ին Կորեական թերակղզու հարավարևմտյան վերջավորության մոտ:

Նավում եղել են 476 ուղևոր և անձնակազմի անդամ, նրանց մեծ մասը եղել են Անսան քաղաքի դպրոցներից մեկի բարձրդասարանցիները: Փրկվել է միայն 172 մարդ: Ներկայում գտնված են 288 զոհվածների մարմինները, հաղորդել է ԻՏԱՌ-ՏԱՍՍ-ը: