Գագիկ Մինասյանն անդրադարձել է Նազարբաևի հայտարարության վերաբերյալ հայաստանյան մամուլի հրապարակումներին

Ազգային ժողովի ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանն Աստանայում Ղազախստանի նախագահ Նուրսուլթան Նազարբաևի հայտարարության վերաբերյալ հայաստանյան մամուլի հրապարակումները բաժանում է երկու մասի: Հունիսի 3-ին լրագրողների հետ հանդիպմանը Գագիկ Մինասյանը նշեց, որ այդ թեմայի վերաբերյալ մամուլում իսկապես կան մտահոգված, ցավով արտահայտվող տեսակետներ առկա խնդիրների և դրանց հնարավոր անհաղթահարելիության մասին: «Սա հասկանալի, բնական և ընդունելի տեսակետ է»,- ասաց Մինասյանը:

Միևնույն ժամանակ, Մինասյանը կարծում է, որ կան նաև մաղձոտ, լավի մեջ միշտ վատը տեսնել ցանկացող հոդվածներ: Նա նշեց, որ այդպիսի հոդվածներին պետք է համապատասխան գնահատական տալ: «Ցավոք, ես չեմ կարող ասել, որ նման տեսակետներ արտահայտողներն իրենց տեսակետն արտահայտում են՝ չիմանալով, թե ինչ են ասում, որովհետև նրանցից շատերը համոզված են, որ Հայաստանը Եվրասիական տնտեսական միության անդամակցության հարցում խնդիրներ չի ունենալու»,- ասաց Մինասյանը:

Պատգամավորն ընդգծեց, որ Հայաստանը պետք է շուրանակի աշխատել նույն ինտենսիվությամբ, ինչպես աշխատել է վերջին 7-8 ամիսների ընթացքում, որովհետև չափազանց լուրջ պայքար է գնում: «Ադրբեջանական կողմը ոչ մի քայլի առջև կանգ չի առնում, որպեսզի կասեցնի այն գործընթացը, որը պետք է ունենա հետևյալ ձևակերպումը. Հայաստանի Հանրապետությունը դառնում է Եվրասիական տնտեսական միության անդամ, իսկ Լեռնային Ղարաբաղի Հանրապետությունը և Հայաստանը նույն տնտեսական տարածքն են, որոնց միջև մաքսային սահման լինել չի կարող»,- եզրափակեց Մինասյանը: