ԵՄ նոր ծրագիրն ուղղված է Հայաստանում ժողովրդավարության ու արդյունավետ կառավարման ամրապնդմանը

Եվրոպական միությունը շարունակում է տարբեր ծրագրերի միջոցով խթանել Հայաստանի` Եվրոպական միությանը մերձեցման գործընթացին և նպաստել մեր երկրում ժողովրդավարության ու արդյունավետ կառավարման ամրապնդմանը: Հունիսի 3-ին Երևանում տեղի ունեցավ «Աջակցություն Հայաստանում ժողովրդավար կառավարմանը» ծրագրի պաշտոնական մեկնարկը, որն ուղղված է քաղաքացիական հասարակության կարողությունների հզորացմանը, ինչպես նաև քաղաքացիական հասարակության գործում նրանց առավել ակտիվ ներգրավմանը: «Եվրոպական միությունը հիմնական դոնորներից է, որ աշխատանքներ է տանում` ուղղված Հայաստանում քաղաքացիական հասարակության ձևավորմանը: Եվրոպական միության միջամտության ռազմավարության հիմնական նպատակներից են. ամրապնդել ժողովրդավարական կառավարությունը, դյուրացնել օբյեկտիվ տեղեկատվության հասանելիությունը և զարգացնել անկախ լրատվամիջոցներ, որոնք կնպաստեն քաղաքական բազմակարծության ձևավորմանը: Չնայած Արևելյան գրծընկերության բոլոր երկրները ձգտում են այդ գաղափարին' քաղաքացիական հասարակության մասնակցության հնարավորությունները շարունակում են սահմանափակ մնալ: Հայաստանում նկատելի են հետևյալ միտումները' քաղաքացիական հասարակության մասնակցությունը քաղաքականության ձևավորման հարաբերություններում, իրավական մոնիտորինգի և պետական կառավարման գործընթացում, սակայն' կրկին սահմանափակ շրջանակներում»,- ասաց Հայաստանում ԵՄ պատվիրակության ղեկավար, դեսպան Տրայան Հրիսթեան:

Հայաստանի արդարադատության նախարար Հովհաննես Մանուկյանը նշեց, որ ծրագիրը լայն հնարավորություն կտա ժողովրդավարության և արդյունավետ կառավարման ամրապնդման համար:

«Եվրոպական միությունը մեր այն գործընկերներից է, որ ակտիվորեն աջակցում է ՀՀ ժողովրդավարական պետության ինստիտուտների զարգացման, մարդու իրավունքների պաշտպանության և արդարադատության առավել արդյունավետ համակարգի ներդրման հարցերում: Այս կարևոր ազդեցության ցայտուն դրսևորումն է ժողովրդավարական կառավարման այս ծրագիրը, որը լայն հնարավորություն կտա ժողովրդավարության և արդյունավետ կառավարման ամրապնդման համար»,- ասաց նախարարը' նշելով, որ նշված նպատակներին հասնելու համար նախարարությունը ամեն կերպ կաջակցի ժողովրդավարական հաստատություններին և քաղաքացիական հասարակությանը:

«Աջակցություն Հայաստանում ժողովրդավար կառավարմանը» ծրագիրը, որի բյուջեն կազմում է 949670 եվրո, կտևի 18 ամիս: Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանի խոսքով, այն իրականցվելու է մեծ մասամբ Երևանում և ևս հինգ մարզերում' Տավուշում, Լոռիում, Գեղարքունիքում, Վայոց Ձորում, Սյունիքում: Ծրագիրն իրականացնում է Բրիտանական խորհուրդը' գործընկերներ Քաղաքացիական զարգացման և համագործակցության հիմնադրամի, Գրանթ Թորնթոնի և Թոմսոնի հիմնադրամի հետ համատեղ: